Հասարակական կարծիքի ուսումնասիրության համառուսական կենտրոնի կողմից Մոսկվայի և Սանկտ Պետերբուրգի բնակիչների շրջանում անցկացված հարցման համաձայն հայերի նկատմամբ համակրանք են տածում Մոսկվայի բնակիչների ընդամենը 3, իսկ պետերբուրգցիների՝ 2 տոկոսը:
Հարցումը ցույց է տվել, որ և՛ Մոսկվայի, և՛ Պետերբուրգի բնակիչները առավել մեծ համակրանք են տածում հենց իրենց՝ ռուսների նկատմամբ (44 և 52 տոկոս համապատասխանաբար): Երկրորդ տեղում բելառուսներն են (17 և 14 տոկոս համապատասխանաբար), երրորդում՝ ուկրաինացիները (15 և 11 տոկոս համապատասխանաբար):
Հարցման համաձայն՝ Մոսկվայի և Պետերբուրգի բնակիչներն առավել վատ են տրամադրված ընդհանուր առմամբ կովկասցիների նկատմամբ (Մոսկվայում՝ 31 տոկոս, Պետերբուրգում՝ 28 տոկոս): Երկրորդ տեղում տաջիկներն են (23 և 24 տոկոս համապատասխանաբար): Մոսկվայի բնակիչների շրջանում չսիրված ազգերի երրորդ հորիզոնականում ադրբեջանցիներն են (17 տոկոս), չորրորդում՝ ուզբեկները (13 տոկոս), իսկ Սանկտ Պետետբուրգում՝ ընդհակառակը (11 և 18 տոկոս համապատասխանաբար): Երկու քաղաքներում էլ տեղացիների կողմից չսիրված ազգերի հինգերորդ հորիզոնականում են չեչենները (12 և 8 համապատասխանաբար):
Այնուհետև մոսկվացիների կողմից չսիրված ազգերի վարկանիշային աղյուսակում հետևում են վրացիները (9 տոկոս), հայերը (6 տոկոս), դաղստանցիները (5 տոկոս), ասիացիներն ընդհանուր առմամբ և ղրղըզները (յուրաքանչյուրը 4 տոկոս):
Հյուսիսային մայրաքաղաքում չսիրված ազգերի աղյուսակը շարունակում են ասիացիները (7 տոկոս), վրացիները (6 տոկոս), դաղստանցիները (5 տոկոս), հայերը (3 տոկոս):
Հարցման արդյունքներին ամբողջությամբ կարող եք ծանոթանալ Հասարակական կարծիքի ուսումնասիրության համառուսական կենտրոնի պաշտոնական կայքում:
Մոսկվայում և Սանկտ-Պետերբուրգում հարցումն անցկացվել է 2011 թ. նոյեմբերի 14-24-ն ընկած ժամանակահատվածում: Դրան յուրաքանչյուր քաղաքում մասնակցել է 1200 մարդ: