«Նարեկացի» արվեստի միության հիմնադիր-նախագահ Նարեկ Հարթունյանը դեռ հավատում է արդար քննությանը: Քրեական դատավարության օրենսգրքի համաձայն՝ Նարեկ Հարթունյանի փաստաբանական խումբը քննիչին բացարկ էր հայտնել, որը մերժվել է դատախազի կողմից:
Դեռեւս հունվարի 10-ին ՀՀ Վերաքննիչ քրեական դատարանում տեղի է ունեցել դատական նիստ, որտեղ քննարկվել է Նարեկ Հարթունյանի նկատմամբ խափանման միջոց կիրառելու մասին առաջին ատյանի դատարանի որոշման դեմ ներկայացված բողոքը: Վերքաննիչ դատարանը մերժել է բողոքը: Այս մասին «Առաջին լրատվական»-ի հետ զրույցում ասաց Նարեկ Հարթունյանի փաստաբան Լեռնիկ Հովհաննիսյանը: Նա նաեւ հավելեց, որ Վերաքննիչ դատարանի որոշումն իրենք բողոքարկել են Վճռաբեկ դատարան:
Հիշեցնենք, որ նախկինում փաստաբանը կասկած էր հայտնել քննիչի գործողությունների վերաբերյալ՝ ասելով, որ նա և գործի քննությունը վերահսկող դատախազն ամեն ինչ անում են քննությունը խոչընդոտելու և սխալ ուղով տանելու համար: Այսօր ևս փաստաբանը հայտնեց այդ մտահոգությունը:
«Նույն քննիչը նույն մարտավարությունը շարունակում է, և դրական փոփոխություն չկա: Այսօրվա հանգամանքները հուսադրող չեն, սակայն պետք է ամեն բան անենք, որպեսզի արդարությունը վերականգնվի»,- մեկնաբանեց Լեռնիկ Հովհաննիսյանը`հավելելով, որ Հարթունյանը նույնպես պահանջում է միայն ու միայն արդար քննություն, որպեսզի ամեն գործողություն լինի օրենքի շրջանակում:
Հիշեցնենք, ՊԵԿ քննչական վարչության վարույթում քննվող քրեական գործով «ՋԻ Էյջ Ստորիջ Էնթրփրայզիս» ՍՊԸ տնօրեն Նարեկ Հարթունյանին, հաշվապահ Արթուր Գալստյանին 2011 թ. դեկտեմբերի 9-ին մեղադրանք էր առաջադրվել ՀՀ քրեական օրենսգրքի 205 հոդվածի 2-րդ, 38-205 հոդվածի 2-րդ (առանձնապես խոշոր չափերով հարկերը, տուրքերը կամ պարտադիր այլ վճարումները վճարելուց չարամտորեն խուսափելը) և 190 հոդվածի 2-րդ մասի 1-ին կետով (հանցավոր ճանապարհով ստացված եկամուտներն օրինականացնելը, որը կատարվել է խոշոր չափերով (փողերի լվացում)), իսկ ընկերության փոխտնօրեն Անի Մնացականյանին` 38-205 հոդվածի 2-րդ մասով (առանձնապես խոշոր չափերով հարկերը, տուրքերը կամ պարտադիր այլ վճարումները վճարելուց չարամտորեն խուսափելուն օժանդակելը), և նրանց նկատմամբ Երևանի Կենտրոն և Նորք-Մարաշ վարչական շրջանների առաջին ատյանի դատարանի որոշմամբ որպես խափանման միջոց էր կիրառվել կալանավորումը: Կալանավորումը կիրառվել էր Նարեկ Հարթունյանի հոր մահվան 40-րդ օրը: Մի քանի օր անց Նարեկ Հարթունյանն ու իր աշխատակիցներն ազատ էին արձակվել:
