Իրանական Mehr News լրատվական գործակալության փոխանցմամբ՝ Ազգային անվտանգության և արտաքին քաղաքականության գծով Իրանի խորհրդարանական հանձնաժողովի փոխնախագահ Իսմայիլ Կոսարին հայտարարել է, որ իրանցի ատոմագետների սպանության հարցը հանդիսանալու է Իրանի միջուկային ծրագրի խնդրով միջազգային միջնորդ խումբ հանդիսացող «վեցյակ»-ի հետ բանակցությունների առաջին քննարկման առարկան.
«ԱԷՄԳ-ի մի շարք տեսուչներ լրտեսներ են։ Իրանական միջուկային օբյեկտներ այցելելուց հետո ԱԷՄԳ-ի համապատասխան զեկույց պատրաստելուց առաջ այդ անձինք իրանցի գիտնականների ու միջուկային օբյեկտների անձնակազմի ներկայացուցիչների վերաբերյալ տեղեկատվություն են տալիս արևմտյան երկրների հատուկ ծառայություններին։ Այս հարցը նույնպես պետք է քննարկվի «վեցյակ»-ի հետ բանակցություններում։
Մենք պետք է արևմտյան երկրներից պահանջենք արտահայտել սեփական դիրքորոշումն ահաբեկչության նկատմամբ։ ԱԷՄԳ-ը նույնպես պետք է որևէ որոշում ընդունի՝ կապված իրանցի գիտնականների դեմ կատարված ահաբեկչությունների հետ։
Իրանի միջուկային գործունեությունը համապատասխանում է միջազգային օրենսդրությանը։ Եթե մեր գործունեությունը հակասում է միջազգային նորմերին, ապա մենք համաձայն ենք պատժամիջոցների սահմանմանը։ Եթե ԱՄՆ-ը ճանաչի միջուկային խաղաղ ծրագրից Իրանի օգտվելու իրավունքը, ապա նա հակաիրանական պատժամիջոցներ սահմանելու համար կզրկվի փաստարկներից։ ԱՄՆ-ը գործում է ջունգլիի օրենքով՝ չպահպանելով միջազգային օրենքները»։
