Նախորդ ընտրությունները եղել են ընտրաձայների ալան-թալանի ընտրություններ: Այսօր լրագրողների հետ հանդիպման ժամանակ ասաց Հայկոմկուսի նախագահ Ռուբեն Թովմասյանը` խոսելով նախընտրական գործընթացների մասին:
Ըստ նրա` հանրապետությունում արդեն սկսվել է ընտրական գործընթացը, կատարվում են վերլուծություններ` հաշվի չառնելով ժողովրդի կարծիքը:
«Հայկոմկուսը եղել է հավասարակշռված կուսակցություն, և մենք հանգամանորեն պատրաստվելու ենք ընտրություններին: Ես ուզում եմ հավաստիացնել, որ անկախ արդյունքից` նախորդ ընտրությունները եղել են ընտրաձայների ալան-թալանի ընտրություններ: Մնում է միայն, որ մարդն իր ճակատին գրի` «ստրուկ եմ» և կրակն եմ ընկել այս համակարգի ձեռքը:
Կուսակցության ուշադրության կենտրոնում են մշտապես եղել սոցիալական արդարության հարցերը: Մենք պատրաստվում ենք խորհրդարանական ընտրություններին, նախորդ ընտրություններին նույնպես անցել էինք ԱԺ, բայց տեղի ունեցավ մեր ձայների հափշտակում»,- ասաց Ռ. Թովմասյանը` հավելելով. եթե իշխանության հավաստիացումները` արդար ընտրություններ անցկացնելու վերաբերյալ, իրականանան, ապա Հայկոմկուսը կանցնի խորհրդարան` հավաքելով 15 %:
Անդրադառնալով ընտրությունների համամասնական և մեծամասնական ընտրակարգերին` նա ասաց, որ կողմնակից է համամասնականին, բայցև հավելեց. «Այստեղ կա նուրբ պահ, հնարավոր է` լինեն մարդիկ, ովքեր կորոշեն առանձին հանդես գալ: Նրանց չպետք է ստիպել դառնալ կուսակցական»:
Ըստ նրա` կուսակցությունները պետք է քննարկեն նաև ընտրություններին մասնակցելու համար անհրաժեշտ 8 մլն գրավի հարցը: «Որտեղի՞ց պետք է հայթայթենք այդ գումարները, մեր կուսակցության շարքերում մեծահարուստներ չկան»:
