ԱԺ «Ժառանգություն» խմբակցության պատգամավոր Անահիտ Բախշյանն այսօր հայտարարեց, որ որպես ընդդիմադիր քաղաքական ուժ` Սերժ Սարգսյանից ակնկալում է պատասխան մանկատների շրջանավարտներին բնակարանով ապահովելու և նրանց տրվող սոցիալական երաշխիքներին վերաբերող ծրագրերի վերահսկողության մասին: Նա ասաց, որ ինքը այդ մասին բարձրաձայնել է այն ժամանակ, երբ Սերժ Սարգսյանը վարչապետ էր: Անահիտ Բախշյանն ասաց, որ ինքը ժամանակին ահազանգել է, որ մանկատների երեխաներին պետբյուջեով հատկացվող գումարները տեղ չեն հասնում, և դժվար ճակատագիր ունեցող այդ երեխաները զուրկ են տարրական խնամքից և հոգատարությունից: Անահիտ Բախշյանը ներկայացրեց որոշակի թվեր, որոնք փաստում են մանկատների գումարները յուրացնելու մասին: Ըստ ՀՕՄ-ի ներկայացրած հաշվետվությունների` առ 15.11.2010 թ. «Պետական աջակցություն մանկական խնամակալական կազմակերպությունների շրջանավարտներին» ծրագրով ծախսվել է 26.700.000 դրամ և «Մանկական խնամակալական կազմակերպությունների շրջանավարտներին կրթաթոշակ և միանվագ օգնություն» ծրագրով` 2.250.000 դրամ: Ըստ ֆինանսների նախարարի տրամադրած տեղեկանքի` նույն ծրագրերի համար պետբյուջեից առ 15.11.10 թ. ծախսվել է համապատասխանաբար 27. 249.600 և 2.150.000 դրամ: Ըստ սոցապնախարարության տվյալների` «Պետական աջակցություն մանկական խնամակալական կազմակերպությունների շրջանավարտներին կրթաթոշակ և միանվագ օգնություն» ծրագրով` 2.250.000 դրամ: Այս թվերը վերաբերում են 2010 թվականին: Անահիտ Բախշյանը վկայակոչեց Վերահսկիչ պալատի 2009 թ. հաշվետվությունը, որտեղ կա մի սահմռկեցուցիչ փաստ: 25.09.2007 թ. Վանաձորի քաղաքապետին ներկայացվել է 74 սաների անձնական քարտերն ու գործերը` երեխաների առանց ծնողական խնամքի կարգավիճակ տալու համար, սակայն 72 երեխաների հայտերը մերժվել են այն դեպքում, երբ նրանց ծնողները խուսափել են ծնողական խնամքից և դաստիարակությունից, և նրանք շուրջ ինը տարի մանկատուն չեն հաճախել: Իսկ Վանաձորի «Խնամակալության և հոգաբարձության հանձնաժողով»-ի կազմի մեջ են մտնում Վանաձորի քաղաքապետ Սամվել Դարբինյանը, Վանաձորի քաղաքապետարանի և Լոռու մարզպետարանի աշխատակիցներ Գագիկ Սիմոնյանը, Լեռնուհի Գևորգյանը, Արարատ Կարապետյանը, Գուրգեն Գևորգյանը, Թամարա Գրիգորյանը, Աշոտ Կարապետյանը, Կարեն Գրիգորյանը, Մարինե Դավթյանը, Անահիտ Բարոյանը, Իրինա Գրիգորյանը, Լուսինե Վարդանյանը, Ռուդիկ Վարոսյանը, Գայանե Քալանթարյանը, Մարգարիտա Շահվերդյանը, Անահիտ Քոչարյանը, Սամվել Դիլոյանը: Անահիտ Բախշյանը հիշեցրեց, որ 2009-2011 թ.թ. պետբյուջեով գումարներ չեն նախատեսվել մանկատան շրջանավարտներին բնակարաններ գնելու համար: