ИТАР-ТАСС-ի փոխանցմամբ՝ Սպիտակ տան Ազգային անվտանգության խորհրդի պաշտոնական ներկայացուցիչ Թոմի Վիտորը հայտարարել է, որ Իրանում լրտեսական ու քայքայիչ գործունեության համար մահվան դատապարտված, իրանական ծագում ունեցող ԱՄՆ քաղաքացի Ամիր Միրզայի Հեքմաթին չի հանդիսանում ամերիկյան Կենտրոնական հետախուզական վարչության (ԿՀՎ) աշխատակից։
«Իրականությանը չեն համապատասխանում այն ենթադրությունները, թե Հեքմաթին երբևէ աշխատել է ԿՀՎ-ում կամ Իրան է գործուղվել։ Իրանական ռեժիմը նախկինում էլ կեղծ մեղադրանքներ է ներկայացրել մարդկանց, ճնշման միջոցով նրանցից խոստովանություն կորզել և քաղաքական նկատառումներից ելնելով՝ ձերբակալել անմեղ ամերիկացիների։
Թեհրանը պետք է անհապաղ ազատ արձակի Հեքմաթիին։ Վաշինգտոնը ներկայումս ստուգում է այն տեղեկատվությունը, որ նրան դատապարտել են մահվան։ Եթե իրականում կայացվել է այդպիսի որոշում, ապա մենք դատապարտում ենք դա»։
Հիշեցնենք, որ երեկ Իրանը հայտարարել էր ԿՀՎ-ի ևս մի քանի լրտեսի ձերբակալության մասին։ Ի դեպ, Իրանի և ԱՄՆ-ի միջև դիվանագիտական հարաբերությունները խզվել են 1980 թվականի ապրիլի 7-ին, և Իրանում ԱՄՆ-ի շահերը ներկայացնում է Շվեյցարիան։
