Բոլորին քաջ հայտնի է, որ ձեռքերը լվանալը վարակը չտարածելու ամենաապահով ձևն է: Սակայն, ինչպես հայտնում են հետազոտողները, ԱՄՆ-ի բժշկական համալսարանների ուսանողների երկու երրորդը չգիտի, թե երբ է հարկավոր լվանալ ձեռքերը:
Ինչպես գրում է Daily Mail-ը, սա նշանակում է, որ մինչ համալսարանները կենտրոնանում են բարդ բժշկական թեորիաներ բացատրելու վրա, պարզագույն հիգիենայի կանոնները արհամարհվում են:
Գերմանիայի Հանովերի բժշկական դպրոցի հետազոտական թիմն անցկացրել է հարցում, որին մասնակցել են ամերիկյան բժշկական համալսարանների 85 ուսանողներ:
Նրանց հարցրել են, թե որ 7 դեպքերում է հարկավոր նախապես լվանալ ձեռքերը:
Ամեն երեք ուսանողներից միայն մեկն է կարողացել ճիշտ նշել 7 դեպքերից հինգը, որոնց դեպքում նախապես հարկավոր է լվանալ ձեռքերը: Նա ասել է, որ հարկավոր է ձեռքերը լվանալ հիվանդի հետ շփումից առաջ, ներերակային հեղուկներ պատրաստելուց առաջ, ձեռնոցները հանելուց հետո, հիվանդի անկողնուն դիպչելուց հետո և փսխունքին կպչելուց հետո:
Ուսանողների միայն 21 տոկոսն է կարողացել ճիշտ պատասխանել, թե որ երկու դեպքում հարկավոր չէ լվանալ ձեռքերը: Հետազոտության արդյունքում պարզվել է նաև, որ ուսանողները չեն իմացել, թե որքան մաքուր պետք է լինեն իրենց ձեռքերը: Հետազոտությունն անցկացրած երեք գիտնականները եզրակացրել են, որ ուսանողներին հարկավոր են հավելյալ դասընթացներ` այս բացթողումը լրացնելու համար: