Ամանորից հետո շատերի մոտ ցանկություն է առաջանում օրգանիզմը բեռնաթափել զանազան յուղոտ, ճարպոտ ու սննդարար ուտեստների, օրինակ` հայերի կողմից սիրված խոզի բդի հետևանքով առաջացած ավելորդ կիլոգրամներից: Ի՞նչ անել օրգանիզմը բեռնաթափելու համար:
«Առաջին լրատվական»-ի հետ զրույցում Հայկական դիետոլոգների ասոցիացիայի նախագահ, «Սուրբ Գրիգոր Լուսավորիչ» բժշկական կենտրոնի բժիշկ-դիետոլոգ Գայանե Ղազարյանը խորհուրդ տվեց մարդկանց օգտագործել թեթև ապուրներ` պատրաստված կամ բանջարեղենից, կամ հավի մսից:
Նրա խոսքով` միայն ապուրներից հետո կարելի է բեռնաթափման օրերի դիմել, այլ կերպ ասած` «նստել մոնոդիետայի վրա», այն է` օգտագործել մեկ սննդատեսակ:
«Կարելի է կիրառել միս-բանջարեղենային դիետա: Օրինակ` կարող ենք վերցնել 1 կիլոգրամ խնձոր կամ որևէ այլ միրգ, բաժանել 5 մասի և այն օրվա մեջ ուտել»,- խորհուրդ տվեց բժիշկ-դիետոլոգը` ընդգծելով, որ բեռնաթափման դիետան խորհուրդ է տրվում բոլորին, անգամ հիվանդ մարդկանց:
Ինչ վերաբերում է հեղուկների ընդունմանը, ապա նա ասաց, որ խնձորը, օրինակ, իր մեջ պարունակում է ջուր, ինչի պատճառով էլ խորհուրդ չի տրվում շատ կիրառել: «Հեղուկի վրա նստել չենք առաջարկում գեր մարդկանց, քանի որ դրանք քաշ են ավելացնում»,- հավելեց նա` ընդգծելով, որ եթե իրեն հարցնեն` ի՞նչն է ավելի շատ օգտակար` խնձո՞րը, թե՞ խնձորի հյութը, ինքը միանշանակ կպատասխանի` խնձորի հյութը:
Ինչ վերաբերում է մեզանում ճիշտ սնվելու մշակույթին, ապա Գ. Ղազարյանը նկատեց, որ մեզանում մարդիկ ավելի զգոն են դարձել, ավելի ուշադիր են սնվելու հարցերում: «Միտում կա դեպի լավացում»,- նշեց բժիշկ-դիետոլոգը:
