Ադրբեջանական APA լրատվական գործակալության փոխանցմամբ՝ Ադրբեջանում ԱՄՆ դեսպան Մեթյու Բրայզան այսօր տեղի ունեցած մամլո ասուլիսին անդրադարձել է ԱՄՆ-Ադրբեջան հարաբերություններին:
«ԱՄՆ-ի հետ Ադրբեջանի համագործակցությունը նպաստել է նրա առափնյա պաշտպանության ստեղծմանն ու ամրապնդմանը։ Այս տարի ուժեղացվել է նաև դեպի Աֆղանստան առաքումների հարցում երկու երկրների համագործակցությունը։
Ամեն տարի Ադրբեջանի օդային տիրույթով թռչում են ամերիկյան մոտ 5000 ինքնաթիռներ, որոնք ոչ ռազմական բեռներ են փոխադրում դեպի Աֆղանստան։ Դա այդ հարցում Ադրբեջանի կարևորության ապացույցն է։ Դա նաև կոմերցիոն օգուտ է պատճառում նրան։
Ինչ վերաբերում է այն տեղեկատվությանը, թե Ադրբեջանը չի թույլատրել իր օդային տարածքում ամերիկյան AWACS-ների թռչելը, ապա դա այնքան էլ ճիշտ տեղեկատվություն չէ»։
Բրայզան հավելել է, որ հաջորդ տարվա հունվարի 3-ին ստիպված կլինի վերադառնալ Վաշինգտոն, եթե մինչ այդ ԱՄՆ Սենատը չհաստատի Ադրբեջանում ԱՄՆ դեսպանի պաշտոնում իր թեկնածությունը։