Իսկապես արժեքավոր շատ արվեստագետներ փակված են իրենց տներում և անտեսված են: Միջակությունը շատացել է, պետք է այն գլխատել: Մենք մշակութային ազգ ենք, ունենք Սարյան, Փելեշյան, Սևակ, Շիրազ: Շատ մտավորականներ, շատ լավ ռեժիսորներ, նկարիչներ պարփակված են ու չգիտեն`ինչ անել: «Առաջին լրատվական»-ի հետ զրույցում անկեղծացավ երգիչ Արամոն:
Նրա խոսքով` անճաշակությունների դեմ պետք է պայքարեն հեռուստաընկերությունները: «Առաջին հերթին Հանրային հեռուստաընկերությունը, ապա մյուսները. չպետք է թույլ տան, որ ոչ արժեքավոր այդ միջակությունները մեծ-մեծ խոսեն ու մեծ քայլերի դիմեն: Իրենք իրավունք չունեն խոսելու արվեստի մասին»,- ասաց երգիչը` ընդգծելով, որ իսկական արվեստագետները ստիպված լքում ու հեռանում են իրենց հայրենիքից` գնահատվելով դրսում:
«Ուզում եմ, որ 2012 թվականը լինի մշակութային առումով բուռն տարի, լինեն լուրջ ներկայացումներ, լավ ֆիլմեր, քանի որ ամենուր քաոսային վիճակ է»,- հավելեց երգիչը` հույս հայտնելով, որ ստեղծագործական առումով ևս տարին իր համար բուռն աշխատանքային կլինի: «Կլինի Էմմայի մենահամերգը, ընթացքում են իմ ձայնասկավառակի աշխատանքները: Մյուս տարի այն արդեն պատրաստ կլինի»,- հայտնեց երգիչը:
Մեզ հետ զրույցում նա խոստովանեց, որ հաջորդ տարի պատրաստվում է խաղալ թատերական ներկայացումներում: «Մոտենում եմ իմ առաջին մասնագիտությանը, քանի որ ես նախ` դերասան եմ, ապա՝ երգիչ»,- նշեց Արամոն` հավելելով, որ հունվարի 13-ից հետո ձեռնամուխ կլինի աշխատանքային բուռն գործունեության:
Այն հարցին` որտե՞ղ է նախընտրում ավանդաբար դիմավորել Ամանորը, երգիչը պատասխանեց. «Միշտ դիմավորում եմ տանը` ընտանիքիս անդամների հետ»:
