2011 թվականը երկխոսության տարի էր: Այսօր լրագրողների հետ հանդիպման ժամանակ նման տեսակետ հայտնեց Տարածաշրջանային հետազոտությունների կենտրոնի տնօրեն Ռիչարդ Կիրակոսյանը` անդրադառնալով Հայաստանի ներքին քաղաքական կյանքին:
Բանախոսը անդրադարձավ քաղաքականության երեք կարևոր ուղղություններին` արտաքին քաղաքականությանը, ռազմական անվտանգությանը և ներքին քաղաքականությանը: Խոսելով արտաքին քաղաքականության մասին` նա նշեց, որ Ադրբեջանի դիրքորոշումը շարունակում է մնալ մաքսիմալիստական, մինչդեռ Հայաստանը ավելի անկեղծ և ճկուն քաղաքականություն է վարում:
Ռիչարդ Կիրակոսյանը նշեց, որ 2012 թվականին մենք կանգնած ենք երկու մարտահրավերների առջև` կապված Թուրքիայի և Ռուսաստանի հետ: Ըստ բանախոսի` առաջինի դեպքում նույնիսկ Ֆրանսիայում Ցեղասպանության հերքումը քրեականացնող օրինագծի ընդունումից հետո Թուրքիայի և Հայաստանի միջև կլինեն բանակցություններ, սակայն դժվար է ասել` դրանք կլինեն անկեղծ, թե ոչ: Խոսքը չի վերաբերում հայ-թուրքական արձանագրություններին, որովհետև դրանք կարելի է համարել մահացած:
Անդրադառնալով Ռուսաստանին` նշեց. եթե վարչապետ Վլադիմիր Պուտինը դառնա նախագահ, Լեռնային Ղարաբաղի հարցի կարգավորման գործընթացում տեղի կունենան փոփոխություններ:
«Մեդվեդևը ժամանակ և կապիտալ է ներդնում այս գործընթացում, սակայն Պուտինը դա չի անի: Պուտինի գործելաոճն այլ է. նա ճնշումներ կբանեցնի կողմերի վրա»,-իր կարծիքը հայտնեց Ռիչարդ Կիրակոսյանը` հավելելով, որ միակ երկիրը Ռուսաստանն է, որը Մինսկի խմբի համանախագահողների շրջանում կարող է փոխել իր գործելաոճը:
