Սիրիայի Ազգային խորհուրդը պնդում է, որ Արաբական երկրների լիգայի դիտորդներին իր ներկայացուցիչների կողմից ուղեկցելը անհրաժեշտ է:
Այս մասին հայտնում է Al-Sharq Al-Awsat թերթը՝ հղում անելով ՍԱԽ անդամ Լուի Սաֆին:
Երկուշաբթի Սիրիայի իշխանությունների ներկայացուցիչները ստորագրել են արձանագրություն, որով Արաբական երկրների լիգայի (ԱԵԼ) դիտորդներին թույլատրում են երկիր մտնել՝ տեսնելու համար՝ արդյո՞ք Սիրիայի կառավարությունը իրականում փորձում է խաղաղ ճանապարհով կարգավորել ճգնաժամը և դադարեցնել արյունահեղությունը:
«Մենք առաջարկում են դիտորդների յուրաքանչյուր խմբի կցել ընդդիմության մի քանի ներկայացուցիչ, որոնք համատեղ մոնիթորինգ են անցկացնելու Սիրիայի տարբեր շրջաններում»,- ասել է ՍԱԽ ներկայացուցիչը:
Նա նշել է, որ այդ դեպքում Սիրիայի իշխանությունները պետք է ապահովեն ուղեկցորդ ընդդիմադիրների անվտանգությունը:
Նրա խոսքերով՝ Սիրիայի Ազգային խորհուրդը անհանգստանում է, որ ԱԵԼ դիտորդներին շարժման լիակատար ազատություն չի տրվելու, և իշխանություններն են որոշելու այն շրջանները, ուր այցելելու են դիտորդները:
Նախօրեին Սիրիայի ԱԳ նախարար Ջիհադ Ալ-Միկդասին հայտարարել էր, որ ԱԵԼ դիտորդները ինքնուրույն որոշելու են այն շրջանները, ուր մտադիր են այցելել, սակայն՝ «կառավարության հաստատմամբ»: Նա նաև ասել է, որ ԱԵԼ դիտորդների առաջին խումբը գալու է Եգիպտոսից:
Հիշեցնենք, որ Սիրիայում 2011 թվականի մարտից շարունակվում են հակակառավարական ցույցերը: Ցուցարարները պահանջում են նախագահ Բաշար Ալ-Ասադի հեռացումն ու սոցիալական բարեփոխումներ:
