Iran News-ի փոխանցմամբ՝ Իրանն ավելացնելու է նավթի արտահանումը դեպի Չինաստան ու Թուրքիա։ Ներկայումս Իրանն օրական մինչև 18 միլիոն բարել հում նավթ է արտահանում դեպի Ասիա, Եվրոպա ու Աֆրիկա։
Նշվում է, որ իրանական նավթ ներկրողների հետ ձեռք են բերվել երկարատև պայմանավորվածություններ նավթի առաքումների վերաբերյալ, որոնք պետք է երկարաձգվեն մինչև հաջորդ տարեվերջ։
Իրանական կողմը հայտարարել է, որ արևմտյան պատժամիջոցների խստացման հավանականությունը երկրի կառավարությանը ստիպում է նավթի մատակարարումների վերաբերյալ բանակցություններ սկսել Իրանի նավթարդյունաբերական գործարանների հետ, որոնց հետ Իրանը մտադիր է պայմանագիր ստորագրել արդեն հաջորդ տարվա սկզբին։
Երկու շաբաթ առաջ չինական կողմը հայտարարեց, որ այս տարվա հոկտեմբերին Իրանը դարձել է Չինաստանին հում նավթի երկրորդ խոշոր մատակարարը։ Օրական ներկրվող իրանական նավթի ծավալը նախորդ տարվա միևնույն ժամանակահատվածի համեմատ ավելացել է 46,000 բարելով՝ կազմելով օրական 597,000 բարել։
Եվրոպայում իրանական նավթի ներկրման վրա պատժամիջոցներ սահմանելու դեպքում Իրանի հաջորդ «թիրախային շուկան» կդառնա Թուրքիան։ Այս տարի Թուրքիայում զգալիորեն ավելացել է իրանական նավթի ներկրումը և արդեն հուլիսին այն կազմել է 1.3 միլիոն տոննա։ Այդ ցուցանիշի շնորհիվ Իրանը դարձել է Թուրքիայի հիմնական նավթամատակարար երկիրը։