ՀՀ վերահսկիչ պալատի նախագահ Իշխան Զաքարյանը Նիդեռլանդներ կատարած աշխատանքային այցի շրջանակում հանդիպել է Նիդերլանդների Հաշվիչ դատարանի խորհրդի համանախագահ Գերիդ դե Յոնգի հետ:
Հանդիպմանը մասնակցել է նաև Նիդեռանդներում Հայաստանի արտակարգ և լիազոր դեսպան Ձյունիկ Աղաջանյանը:
Ի. Զաքարյանը կարևորել է եվրոպական համագործակցության շրջանակում Նիդեռլանդների հետ համագործակցությունը: «Ճիշտ է կան օրենսդրական տարբերություններ, սակայն շատ հարցերում մեր երկիրը փորձում է մոտենալ եվրոպական չափանիշներին »,- Դե Յոնգի հետ հանդիպմանն ասել է Ի. Զաքարյանը և տեղեկացրել, որ եվրոպական համագործակցության արդյունքում երկու տարվա ընթացքում ՎՊ-ն ներկայացրել է մոտ չորս տասնյակ օրենսդրական փոփոխությունների վերաբերյալ առաջարկություններ:
Գերիդ դե Յոնգն իր հերթին շնորհակալություն է հայտնել հաշվիչ դատարանի հրավերը ընդունելու և համագործակցելու համար: «Նիդերլանդների հաշվիչ դատարանը գոյություն ունի դեռևս 15-րդ դարից, և մենք պատրաստ ենք մեր բազմադարյա փորձը փոխանցել մեր երիտասարդ գործընկերոջը` ՀՀ վերահսկիչ պալատին»,- ասել է Դե Յոնգը:
Այցի ընթացքում քննարկվել են 2012-2013թթ. Նիդերլանդների հաշվիչ դատարանի կողմից ՀՀ վերահսկիչ պալատին տեխնիկական աջակցություն ցուցաբերելու վերաբերյալ նոր առաջարկները և համատեղ աշխատանքային ծրագրերը:
Մասնավորապես, բարձրագույն վերահսկիչ մարմինների միջազգային ստանդարտներին համապատասխանեցնելու նպատակով հոլանդացի փորձագետները կգնահատեն Վերահսկիչ պալատին վերաբերվող ՀՀ օրենսդրական և մեթոդական դաշտը: ՀՀ Վերահսկիչ պալատի տեղեկատվական տեխնոլոգիաների հզորացման նպատակով կբարելավվեն պալատի ենթակառուցվածքները:
Երկու երկրների բարձրագույն վերահսկիչ կառույցների համագործակցության արդյունքում 2012-2013թ. ընթացքում հոլանդական կողմը կշարունակի համակարգչային նոր սարքավորումների տրամադրումը, ինչպես նաև Վերահսկիչ պալատի ինտերնետային էջի (coc.am) և էլեկտրոնային հասցեների համակարգի սպասարկման, կայքի անգլերեն և ռուսերեն լեզուներով թարգմանությունների ֆինանսավորումը:
Վերահսկողության արդյունավետության բարձրացման նպատակով հոլանդացի մասնագետները կօգնեն հայ գործընկերներին օգտագործել Եվրոպայում լայնորեն կիրառվող համակարգչային վերլուծական ժամանակակից ծրագրեր:
Ի.Զաքարյանի այցի ընթացքում երկու երկրների Բարձրագույն վերահսկիչ մարմինների միջև ձեռք է բերվել պայմանավորվածություն տեխնիկական աջակցությունից բացի, սկսել համագործակցություն վերահսկողության ոլորտում: Որպես հայ-նիդեռլանդական վերահսկողության գործնական քայլ` հաջորդ տարի կիրականացվի բնապահպանական թեմայով համատեղ վերահսկողություն, իսկ 2013թ. վերահսկողությունը կշարունակվի հարկային, մաքսային ոլորտներում:
Ինչպես հայտնում են ՎՊ լրատվական ծառայությունից, ՀՀ Վերահսկիչ պալատի և Նիդեռլանդների Հաշվիչ դատարանի համագործակցության հիմքը դրվել է 2009թ.` ՀՀ ՎՊ-ին տեխնիկական աջակցություն ցուցաբերելու մասին ստորագրված համագործակցության համաձայնագրով:
ՎՊ նախագահ Իշխան Զաքարյանը Նիդեռլանդներից կմեկնի ՌԴ մայրաքաղաք Մոսկվա, որտեղ հանդիպում կունենա ՌԴ հաշվիչ պալատի նախագահ Սերգեյ Ստեպաշինի հետ:
