News Georgia-ի փոխանցմամբ՝ մինչև այս տարեվերջ Հարավային Օսիայում ստեղծվելու է Սահմանադրական դատարան։ Այս մասին հայտարարել է դատավոր Էլդար Կոկոևը։ Սահմանադրական դատարանի ստեղծման որոշումը հարուցել է ընդդիմության զարմանքը։
Նշվում է, որ հարավօսական ընդդիմության առաջնորդ Ալլա Ջիոևայի և Հարավային Օսիայի նախկին նախագահ Էդուարդ Կոկոյտիի միջև ձեռք բերված պայմանավորվածության համաձայն՝ Հարավային Օսիայի Գերագույն դատարանի նախագահ Ացամազ Բիչենովը, գլխավոր դատախազ Թեյմուրազ Խուգաևը և նրա տեղակալ Կոկոևը պետք է հեռացվեին զբաղեցրած պաշտոններից։
Սակայն դեկտեմբերի 10-ի իր հրաժարականից առաջ Կոկոյտին Կոկոևին նշանակում է դեռևս գոյություն չունեցող Սահմանադրական դատարանի ղեկավար, իսկ դեկտեմբերի 14-ին Հարավային Օսիայի խորհրդարանը դեմ է քվեարկում Խուգաևի ու Բիչենովի պաշտոնաթողությանը։
Այս ամենը հարուցել է ընդդիմության զարմանքն ու զայրույթը, ինչի համար նա իշխանություններին մեղադրել է ձեռք բերված պայմանավորվածությունների խախտման մեջ։
Կոկոկևի խոսքերով՝ Հարավային Օսիայի Սահմանադրական դատարանը բաղկացած է լինելու 5 դատավորներից, որոնցից երկուսին նշանակելու է նախագահը, ևս երկուսինը՝ խորհրդարանը։ 5-րդ դատավորի թեկնածությունն առաջադրելու է նախագահը, սակայն հաստատելու է խորհրդարանը։
Կոկոևը հավելել է, որ Սահմանադրական դատարանը կարող է ստեղծվել մինչև տարեվերջ՝ ընդգծելով, որ ավելի լավ կլիներ, ներկայիս քաղաքական իրավիճակը չսրելու համար, դրա ստեղծումը հետաձգել հաջորդ տարվա մարտին կայանալիք կրկնական նախագահական ընտրություններից հետո։
