Եվրոպայում գնացքները չեն աշխատում, ինքնաթիռները չեն թռչում, մարդիկ սառչում են, իսկ իշանություններն այդ ամենի դեմ անզոր են: Այս ամենի պատճառը Եվրոպայում չդադարող ձյունն է և ցածր ջերմաստիճանը: Այս մասին հաղորդում է BBC: Հեռուստաընկերության փոխանցմամբ, Լոնդոնի արևմուտքում ջերաստիճանը հասել է -14-ի, որոշ վայրերում` -20-ի, որը ռեկորդային ցուցանիշ է 1990թ.-ից հետո:
Անգլիայի և Ուելսի հարավային շրջաններում ձյան ծածկույթը հասնում է 20սմ-ի:
Հաղորդակցությունը Լա Մանշով դադարեցվել է: Հետաձգվել է Eurostar գնացքներով Լոնդոնից դեպի Բրյուսել 8 չվերթ: Տոմսերի վաճառքը դադարեցվել է մինչև դեկտեմբերի 24-ը:
Երթուղային ճանապարհների սառցակալման պատճառով խաթարվել է նաև հայտնի Քինգս-Քրոս կայարանի աշխատանքը: Մենք արդեն հայտնել էինք, որ չեն գործում Լոնդոնի, Էդինբուրգի և Սաութհեմփթոնի օդանավակայանները: Հետաձգվել է British Airways-ի 80 չվերթ: Այս պահի դրությամբ Լոնդոնի քաղաքապետը անհանգստացած դիմել է BAA առաջատար օպերատորին` պահանջելով կարգավորել ավիափոխադրումները: Ի պատասխան նրա պահանջներին` ընկերությունից պատասխանել են, որ 200 ինքնաթիռ Հիթրոու օդանավակայանում մնացել են ոչ թե չար ուժերի ներգործության հետևանքով, այլ անվադողերի սառցակալման:
Ինչպես գրում է The Guardian թերթը, տեղափոխումների հետ խնդիրները անգլացիներին, որոնք Ծննդյան օրերից առաջ մեծ առևտուր են անում, կարող են թողնել առանց նվերների և սննդամթերքի: IHSGlobal-ի վերլուծաբանների կարծիքով, եթե իրավիճակը չփոխվի, ապա երկիրը կկանգնի դատարկ խանութների խնդրի առջև: Մատակարարումն արդեն խաթարված է, որովհետև ապրանքները մնացել են նավահանգիստներում:
Ֆրանսիայում հետաձգվել է ավիաչվերթների 40%-ը: Շառլ դե Գոլի օդանավակայանում մնացել են ավելի քան 20 հազար ուղևոր:
Գերմանական Ֆրանկֆուրտում հետաձգվել է 540 չվերթ: Deutsche Bahn ազգային երկաթուղային օպերատորը խորհուրդ է տվել չճանապարհորդել օրվա երկրորդ կեսին:
Ամստերդամի օդանավակայանում հետաձգվել են բազմաթիվ չվերթներ: Այնտեղ է մնացել ավելի քան 3 հազար մարդ: Բալկաններում ցրտահարության հետևանքով մահացել է 4 մարդ: Բոսնիական Բանյե-Լուկայում ծեր զույգը սառել է իր սեփական տանը, որ կտրվել էր քաղաքակրթությունից ձնաբքի պատճառով:
