Ռուսական Труд թերթի փոխանցմամբ, ոչ պաշտոնական տվյալներով, Թեհրանը Ռուսաստանին ու Չինաստանին առաջարկել է ծանոթանալ ամերիկյան ռազմական վերջին գաղտնիքների հետ։ Խոսքը դեկտեմբերի 4-ին Իրանի արևելքում հարկադիր վայրէջք կատարած ամերիկյան RQ-170 անօդաչու հետախուզական ինքնաթիռի մասին է։
«Սթելս» տեխնոլոգիայով պատրաստված այդ անօդաչու ինքնաթիռը պատկանել է Կենտրոնական հետախուզական վարչությանը (ԿՀՎ) և հատուկ առաքելություն է կատարել։
Չհաստատված տվյալներով, Իրանի ղեկավարությունն արդեն իսկ համապատասխան հրավերներ է ուղարկել Ռուսաստանի ու Չինաստանի հատուկ հանձնաժողովներին՝ առաջարկելով նրանց ծանոթանալ ամերիկյան ռազմական արդյունաբերության «նոու-հաու»-ի հետ։
Փոխարենը, իրանական կողմը ցանկանում է ստանալ «երկիր-օդ» տիպի կոշտ վառելիքով հրթիռների պատրաստման տեխնոլոգիաները և կնքել ամենաարդիականացված տարբերակով С-300 հակաօդային համալիրների առաքման վերաբերյալ պայմանագիր։
Հիշեցնենք, որ С-300-ների առաքման մասին պայմանագիրը Ռուսաստանն ու Իրանը կնքել են 2007 թվականի վերջին։ Սակայն 2010 թվականի սեպտեմբերին Ռուսաստանի նախագահ Դմիտրի Մեդվեդևն արգելեց դրանց տրամադրումն Իրանին, քանի որ դա կնշանակեր Իրանի հանդեպ ՄԱԿ-ի ԱԽ սահմանած պատժամիջոցների խախտում։
С-300-ների առաքման մասին պայմանագրի չեղյալ հայտարարումից հետո Ռուսաստանն Իրանին վերադարձրեց դրա համար ստացած 167 միլիոն դոլարի կանխավճարը։