Շաբաթ օրը Գլենդելում ոստիկանության գրասենյակի տարածքում պայթուցիկ սարք տեղադրելու համար ձերբակալվել է 50-ամյա Սարո Հախվերդյանը: Բարեբախտաբար, ոչ ոք չի տուժել: Ինչպես հաղորդում է Glendale News-Press պարբերականը, ոստիկանությունում Հախվերդյանը հայտնել է, որ 6 դյույմ երկարությամբ և 3 դյույմ լայնությամբ պայթուցիկը պատրաստել է ինքնապաշտպանական նպատակով, քանի որ երկու մարդ ցանկանում են իրեն սպանել:
Հախվերդյանի ընտանիքի անդամները պատմել են, թե իրենք նկատել են, որ նա ինչ-որ բան է պատրաստում և վերջին շրջանում սարսափելի վախեցած է:
Ոստիկանությունից հայտնել են, որ Հախվերդյանը իր զարմիկի և եղբոր ուղեկցությամբ եկել է ոստիկանություն և հայտնել պայթուցիկի գտնվելու վայրը: Պայթուցիկը վնասազերծվել է:
Բացի այդ, ոստիկանությունում նշել են, որ Հախվերդյանը պարանոիդ է, քանի որ նրան թվում է, թե իրեն հետևում են, սակայն հստակ չի կարողանում նկարագրել, թե ովքեր:
Ոստիկանության սերժանտեը հայտնել է, որ պայթուցիկը կարող էր սպանել 150 ոտնաչափ տարածության վրա, և որ այն պատրաստվել է ինչ-որ մեկին սպանելու կամ լրջորեն վնասելու համար:
