WikiLeaks-ում հրապարակված հերթական փաստաթուղթն առնչվում է Հայաստանին։ Վրաստանում ԱՄՆ դեսպանատան գաղտնի հեռագրերից մեկում ասվում է, որ 2009 թ. օգոստոսի 26-ին երեք քաղաքացի իրենց մարդատար մեքենայով Վրաստան են մուտք գործել Սադախլոյի անցակետով: Ստուգիչ մոնիտորները մեքենայում ռադիացիա են արձանագրել: Մեքենայի վարորդը պարզաբանել է, վերջերս իրականացված վիրահատությումից հետո ռադիոակտիվ իզոտոպ է տեղադրվել մարմնի մեջ: Ոստիկանությունը ոչ մի փաստաթուղթ չի պահանջել` թույլատրելով մեքենային անարգել մուտք գործել Վրաստանի տարածք: Հաջորդ օրն իսկ մեքենան վերադարձել է Հայաստան, և ստուգիչ մոնիտորները կրկին ռադիացիա են արձանագրել: Այս անգամ մանրամասն վերլուծությամբ պարզվել է, որ մեքենան աղտոտված է Ցեզիում-137-ով: Մեքենայի խուզարկությունը, սակայն, ոչ մի արդյունք չի տվել։
Վարորդն ու ուղևորները հարցաքննվել են և հայտարարել, թե մեքենան աղտոտվել է մի գյուղում, որի կողքին ռադիոկայան կա: Հայաստանի քաղաքացիներին ազատ են արձակել: Ներկայումս ՀԴԲ-ի զանգվածային բնաջնջման զենքի տարածաշրջանային համակարգողը հետաքննում է միջադեպը:
Հիշեցնենք, որ 2010 թ. մարտին Վրաստանի հատուկ ծառայությունների աշխատակիցները կասեցրել էին Հայաստանի երկու քաղաքացիների՝ Վրաստանում հարստացված ուրանի իրացման փորձը։ 2010 թ. ապրիլին նշված գործարքին մասնակցության կասկածանքով Հայաստանի ազգային անվտանգության մարմինների կողմից ձերբակալվել է Հայաստանի քաղաքացի Գարիկ Դադայանը, ում նկատմամբ քրեական գործ է հարուցվել ռադիոակտիվ նյութերի մաքսանենգության գործով։ Վրացական կողմի հաղորդմամբ, մաքսանենգներին հաջողվել էր Երևանից Թբիլիսի ուղևորվող գնացքով անցկացնել 18 գրամ հարստացված ուրան։
Այս ամենը հաշվի առնելով՝ կարելի է վստահ ասել, որ միջազգային հանրությունը Հայաստանին շուտով կարող է դասել միջուկային զենքի տարածմանն աջակցող երկրների շարքը՝ դրանից բխող բոլոր հետևանքներով: