Թուրքական Sabah թերթի փոխանցմամբ՝ Թուրքիայում պատրաստ է «Ալ Քաիդա»-ի թուրքական մասնաճյուղի 11 անդամների նկատմամբ 50 էջանոց մեղադրականը։
Դրանում ահաբեկիչները մեղադրվում են Թուրքիայի խորհրդարանը հօդս ցնդեցնելու մտադրություն ունենալու մեջ, ինչի մասին վկայում է նրանցից 700 կիլոգրամ պայթանյութի առգրավվումը։
Բացի այդ, առգրավվել էին նրանց պատկանող մի շարք փաստաթղթեր, որոնցում Թուրքիան որակված էր որպես «պատերազմական տարածաշրջան», իսկ թուրքական պետությունը՝ «շեյթան» (սատանա)։
Թուրքական իշխանությունները ներկայացված էին որպես կրոնից (իսլամ) հեռացածներ, ինչի համար կոչ էր արվում «ջիհադ» (սրբազան պատերազմ) հայտարարել Թուրքիայի նկատմամբ։
Հիշեցնենք, որ «Ալ-Քաիդա»-ի թուրքական մասնաճյուղը մեղադրվում է ստամբուլյան երկու սինագոգերի, ինչպես նաև 2003 թվականի նոյեմբերին բրիտանական HSBC բանկի թուրքական մասնաճյուղի վրա գործած հարձակումների մեջ։ 8 տարի առաջ տեղի ունեցած այդ հարձակման արդյունքում զոհվել էր 61 մարդ, ավելի քան 600 մարդ վիրավորվել էր։
Բացի այդ, այս տարվա հուլիսին հայտնի դարձավ, որ «Ալ-Քաիդա»-ն մտադրվել էր պայթեցնել մայրաքաղաք Անկարայում գտնվող ԱՄՆ դեսպանատունը։
