ՀՀ ԱԺ-ում այսօր տեղի ունեցած ԱԺ խմբակցությունների ճեպազրույցին ԱԺ «Ժառանգություն» խմբակցության պատգամավոր Արմեն Մարտիրոսյանին հարց ուղղվեց. ինչպե՞ս են վերաբերվում ՀՅԴ կեցվածքին` կապված ՀՀԿ-ական Սամվել Նիկոյանին որպես ԱԺ նախագահ կողմ քվեարկելու հետ:
Ա. Մարտիրոսյանը նշեց` դա ՀՅԴ-ի համոզմունքն ու քաղաքական կամքն է, և ինքը չի ցանկանում ծավալվել այդ թեմայով:
Կառավարությանն անվստահությանը իրենք կողմ կլինեն` անկախ նրանից, թե ով է հանդես գալիս այդ նախաձեռնությամբ: Նույնը վերաբերում է այդ հարցով ՍԴ դիմելու` Դաշնակցության նախաձեռնությանը:
«Ժառանգության» ներկայացուցիչ Լարիսա Ալավերդյանը ևս չցանկացավ քննարկել Դաշնակցության պահվածքը` նկատելով, որ դա որևէ կերպ չի ազդելու «Ժառանգություն»-ՀՅԴ հարաբերությունների վրա, մանավանդ` եթե առաջանա քաղաքական և հասարակական խնդիրների համար պայքարի անհրաժեշտություն:
ՕԵԿ խմբակցության ղեկավար Հեղինե Բիշարյանը ճեպազրույցի ընթացքում անդրադառնալով միասնական ցուցակով հանդես գալու շուրջ քննարկումներին` նշեց, թե դա երկարատև բամբասանք է և անընդհատ շրջանառվում է:
«Կոալիցիոն ուժերի միջև նման քննարկումներ դեռ տեղի չեն ունեցել, և քաղաքական ուժերն առանձին են գնալու ընտրությունների` դա երևում է հեռուստաընկերություններով նրանց ակտիվ քննարկումներից ու հանդիպումներից»:
Ապա Բիշարյանը հավելեց. «Իսկ ընդհանրապես միասնական դաշինքի մասին մենք միշտ ասել ենք` եթե հանկարծ երկրի առջև խնդիրներ ծառանան, միասնական դաշինքի հարցը կարող է դառնալ քննարկման առարկա»:
Հարցին, թե որ դեպքում դա կարող է լինել, պատասխանեց. «Կլինեն` կասենք»:
Ի դեպ, տեղեկացնենք, որ ԱԺ ԲՀԿ խմբակցությունն այսօր չներկայացավ ճեպազրույցին: