Իրանական The Tehran Times թերթը, վկայակոչելով Իրանի զինված ուժերում ունեցած իր աղբյուրին, հայտնում է, որ Ռուսաստանն ու Չինաստանը հետաքրքրություն են ցուցաբերել Իրանի տարածքում ընկած (կամ վայր գցված) ամերիկյան RQ-170 Sentinel տիպի անօդաչու թռչող սարքի (ԱԹՍ) նկատմամբ։
Աղբյուրի պնդմամբ՝ ռուս և չինացի փորձագետները դիմել են Իրանի իշխանություններին՝ խնդրելով թույլատրել ամերիկյան ԱԹՍ-ի հետազոտումը։ Չի բացառվում, որ դա տեղի ունենա, և նրանք համատեղ զննեն ամերիկյան ԱԹՍ-ն։
Հիշեցնենք, որ իրանական կողմն արդեն իսկ հայտարարել է, որ մտադիր է օգտվել այդ ԱԹՍ-ի նորագույն տեխնոլոգիաներից, եթե այն գերազանցի Իրանի զինված ուժերում առկա ԱԹՍ-ներին։ Ավելին, Իրանը պատրաստ է դեպքերի զարգացման նմանատիպ սցենարի դեպքում արտադրել ամերիկյան ԱԹՍ-ներ։
