Մալայզիայում ներկայացրել են Enmac MQ710 հեռախոսը՝ նախատեսված հատուկ հավատացյալ մուսուլմանների համար: Ինչպես հաղորդում է The Daily Telegraph պարբերականը, նոր հեռախոսը մշակել է տեղական Enmac ընկերությունը:
Պարբերականը գրում է, որ հեռախոսում տեղադրված է Ղուրանի տեքստը արաբերենով և ևս 29 լեզուներով, ինչպես նաև Ղուրանի աուդիոգիրքը և հադիսների ժողովածուները (Մուհամմադ մարգարեի վարքի և գործունեության մասին):
Հեռախոսն օժտված է նաև այլ հատուկ հավելվածներով, որոնք, այն մշակողների կարծիքով, օգտակար կլինեն մուսուլմաններին: Այսպես, Qibla Compass ծրագիրը ցույց է տալիս, թե որ կողմի վրա է գտնվում Մեքքան (աղոթքի ժամանակ մուսուլմանները դեմքով դեպի Մեքքա են շրջվում): Hajj Guide հավելվածը հրահանգներ է տալիս, թե ինչպես ճիշտ հաջ կատարել և այլն:
Ընկերության կայքում նշվում է, որ աղոթքի ժամանակ հեռախոսն ավտոմատ անցնում է անձայն ռեժիմի:
Բացի հեռախոսներից, Enmac-ն արտադրում է նաև նվագարկիչներ, նեթբուքներ հատուկ մուսուլմանների համար, որոնց մեջ նույնպես տեղադրված է Ղուրան՝ աուդիոգրքով և տեքստային տարբերակով:
