Քիչ առաջ «Առաջին լրատվական»-ը ԱԺ ԲՀԿ խմբակցության քարտուղար Արամ Սաֆարյանին հարց ուղղեց` ի՞նչ փուլում են Հայ ազգային կոնգրեսի առաջնորդ Լևոն Տեր-Պետրոսյանի ելույթում հնչած` «Բարգավաճ Հայաստան» կուսակցության հետ հնարավոր համագործակցության շուրջ քննարկումները, արդյոք կուսակցությունը Գագիկ Ծառուկյանի վերադարձից հետո քննարկո՞ւմ է այդ թեման:
«Ես Մոսկվայից վերադարձել եմ երեկոյան ժամը 22.30-ին: Ես նրա վերադարձից հետո իմ կուսակցության ղեկավարին չեմ հանդիպել: Որևէ մեկնաբանություն չեմ կարող անել»:
«Առաջին լրատվական»-ը երեկ տեղեկացրել էր, որ նոյեմբերի 17-ին Մասիս քաղաքի քաղաքապետարանում ձերբակալված քաղաքապետարանի կոմունալ բաժնի պետ Արթուր Մայիսի Ղազարյանի գործով ընթանում են քննչական գործողություններ, և օրեր առաջ գործը քննող քննիչը Արթուր Ղազարյանին ուղարկել է նարկոդիսպանսեր` պարզելու համար` նա թմրադեղ օգտագործել է, թե ոչ: Երեկ առավոտյան հայտնի դարձավ, որ Արթուր Ղազարյանից վերցված մազի և մեզի անալիզների պատասխանը դրական է եղել:
Հիշեցնենք, ձերբակալվածի հայրը` Մայիս Ղազարյանը, Մասիսի Ընտրական հանձնաժողովի «Բարգավաճ Հայաստան» կուսակցության ներկայացուցիչն է: Ըստ մեր տեղեկությունների` ձերբակալվածը «Բարգավաճ Հայաստան» կուսակցության անդամ է:
«Առաջին լրատվական»-ը քիչ առաջ ԲՀԿ-ական պատգամավոր Արամ Սարֆարյանին հարցրեց, թե ինչպես է ԲՀԿ-ական պատգամավորը վերաբերվում վերջին օրերի նմանօրինակ տեղեկություններին:
«Վերջին 12 օրերից ութը անցկացրել եմ Ռուսաստանի Դաշնությունում: Երևանում եղել եմ ընդմիջումով` միայն երկու օր: Որևէ թեմայով որևէ մեկնաբանություն չեմ կարող անել: Հույս ունեմ, որ նման բան չկա, եթե լիներ` ես կիմանայի, և եթե լինի` ես անպայման ձեզ տեղյակ կպահեմ»: