Associated Press-ի փոխանցմամբ՝ Ավստրալիայի վարչապետ Քևին Ռադդը հայտարարել է Իրանի նկատմամբ հավելյալ պատժամիջոցներ սահմանելու մասին, որոնք առնչվում են նավթային և ֆինանսական ոլորտներին։
Ռադդի խոսքերով՝ ավստրալիական իշխանությունների այդ որոշումը պայմանավորված է նոյեմբերի 29-ին Թեհրանում Մեծ Բրիտանիայի դեսպանատան վրա կատարված հարձակմամբ, ինչպես նաև նոյեմբերի 8-ին Իրանի միջուկային ծրագրի վերաբերյալ ԱԷՄԳ-ի զեկույցի հրապարակմամբ.
«Նոր պատժամիջոցներն առնչվում են մի շարք ընկերությունների ու մասնավոր անձանց, որոնք կապված են Իրանի միջուկային ծրագրի հետ։ Բացի այդ, դրանք սահմանափակումներ են մտցնում Իրանի նավթային ու ֆինանսական ոլորտներում գործարքներ կնքելու նկատմամբ։
Թեհրանը պետք է կառուցողական քայլեր ձեռնարկի իր միջուկային ծրագրի կապակցությամբ։ Ավստրալիայի այս դիրքորոշումը համընկնում է ԱՄՆ-ի, ԵՄ-ի և մի շարք այլ երկրների դիրքորոշումների հետ»։
Հիշեցնենք, որ ավելի վաղ Ավստրալիան մի շարք սահմանափակումներ էր մտցրել Իրանի նավթագազային հատվածի հետ գործարար կապեր ունենալու հարցում։ Բացի այդ, ավստրալական կողմի՝ ավելի վաղ սահմանած այդ պատժամիջոցներով արգելվում էր Իրանին զենքի և երկակի նշանակության նյութերի վաճառքը, որոնք կարող են գործածվել միջուկային հրթիռների, քիմիական ու կենսաբանական զենքի մշակման ժամանակ։
