Գագիկ Ծառուկյանը վերադարձել է Դուբայից, որտեղ նշում էր իր ծննդյան տարեդարձը: Այս ընթացքում, ինչ նա Դուբայում էր, Հայաստանում երևի թե ոչ պակաս թեժ էր իրավիճակը, ինչպես որ հաստատ եղել է Ծառուկյանի ծննդյան հանդիսություններին: Սակայն, եթե Դուբայում թեժ էր զվարճանքը, ապա Հայաստանում թեժ էր իրավիճակը ԲՀԿ քաղաքական գործունեության հետ կապված, որը առաջնային պլան էր մղվել Լևոն Տեր-Պետրոսյանի ելույթից հետո: Սակայն այս ամենի մասին շատ են եղել վերլուծություններ, մեկնաբանություններ և դիտարկումներ` և մեր, և շատ այլ լրատվական միջոցներում:
Մենք այժմ պարզապես կփորձենք ընթերցողների ուշադրությունը հրավիրել մեկ ուրիշ հանգամանքի վրա, որը, մեր կարծիքով, այս ամբողջ պատմության ընթացքում անտեսվել է անարդարացիորեն, չի կարևորվել թյուրիմացաբար: Խոսքն այն մասին է, որ երբ Հայաստանում քննարկվում է պետության ճակատագրի համար կարևոր զարգացումների համատեքստում ԲՀԿ պահվածքը, այդ կուսակցության ղեկավարը Դուբայում ՀՀ մի շարք նախկին ու ներկա պաշտոնյաների հետ զվարճանում է իր ծննդյան տարեդարձի կապակցությամբ: Այսինքն` իրականում սրանով է Ծառուկյանը տվել հենց առաջին իսկ պատասխանն այս ողջ քննարկումների ընթացքում: Այսինքն` այս մարդը զվարճանքների մարդ է, որը կարևորագույն քաղաքական պահին Հայաստանից հեռու զվարճանում է իր ծննդյան կապակցությամբ:
Սա, իհարկե, դատապարտելի չէ, և ըստ էության ամեն ոք էլ ունի նման իրավունք, և ոչ ոք ի զորու չէ դատափետել կամ քննադատել տվյալ անձնավորությանը: Սակայն բոլորս էլ ունենք եզրակացություններ անելու իրավունք, և ըստ էության այս տեսանկյունից եզրակացության հիանալի առիթ է այն, որ երբ ամբողջ ազգը մի մարդու հարց է քննարկում պետության ճակատագրի կոնտեքստում, այդ մարդն իր համար հանգիստ զվարճանում է Դուբայում` ըստ էության ցույց տալով, թե իր համար իրականում ինչ կոնտեքստ ունի պետության ճակատագիրը: Այս տեսանկյունից հարկ ենք համարում նշել, որ Ծառուկյանն ամենևին եզակի չէ Հայաստանի օլիգարխիական համակարգում: Պարզապես նրա բախտը չբերեց, և Լևոն Տեր-Պետրոսյանը նրա անունը տվեց նոյեմբերի 25-ի հանրահավաքում, որովհետև նրանից առաջ էլ բախտը չէր բերել, որ Ռոբերտ Քոչարյանն իրեն էր ընտրել Սերժ Սարգսյանի դեմ պայքարի ներիշխանական հիմնական գործիք: