Ռուս-վրացական սահմանին գտնվող Վերին Լարսի անցակետում շարունակում են կուտակված մնալ մոտ 250 բեռնատարներ: Այս մասին «Առաջին լրատվական»-ի հետ զրույցում տեղեկացրեց Հայաստանի միջազգային փոխադրողների ասոցիացիայի գլխավոր քարտուղար Վահագն Բադալյանը`խոսելով Վերին Լարսի անցակետում առաջացած բեռնակուտակման շուրջ:
Ըստ Վ. Բադալյանի` մեքենաները դեռևս կանգնած են և առաջ շարժվելու հնարավորություն չունեն: Նա հույս հայտնեց, որ մոտակա մեկ-երկու օրերի ընթացքում փոփոխություններ կլինեն, քանի որ մաքրման աշխատանքները Հայաստանյան կողմի ուժերով շարունակվում են:
«Մեր ասոցիացիան ունի փոխադրողներ, որոնք իրենց շարժակազմով կանգնած են Ռոստովից մինչև Վերին Լարսի սահմանային անցակետ: Խոսքը շուրջ 250 մեքենայի մասին է: Նրանք բոլորը հենց սահմանային անցակետում չեն կանգնած, այլ կանգնած են մինչև Դոնի Ռոստով, Պյատիգորսկ»,- նշեց ասոցիացիայի գլխավոր քարտուղարը` հավելելով, որ առաջ շարժվելն իմաստ չունի, այդ պատճառով այժմ սպասողական վիճակ է. սպասում են, որ ճանապարհը բացվի, կամ այլընտրանք գտնեն այդ բեռները տեղ հասցնելու համար:
Վահագն Բադալյանը խոսեց Նովոռոսիյսկ-Փոթի լաստանավային գետանցման տարբերակի շուրջ: Ըստ նրա` սա այլընտրանք է բեռները բերելու: Հայաստանի միջազգային փոխադրողների ասոցիացիայի գլխավոր քարտուղարի համոզմամբ` սա ավելի թանկ տարբերակ է: «Սակայն հնարավոր է՝ գնանք այս քայլին, եթե երկար ժամանակ այս հարցը չլուծվի, կարող է ապրանքը փչանալ: Ստիպված ենք առավել թանկ ճանապարհին դիմել, որ հարցերը լուծվեն»,- ամփոփեց Վ. Բադալյանը`տեղեկացնելով, որ խնդրի լուծման նպատակով ասոցիացիայի նախագահ Հերբերտ Համբարձումյանն այժմ Վրաստանում է:
«Առաջին լրատվական»-ին ՀՀ տրանսպորտի և կապի նախարարությունից տեղեկացրին, որ այժմ Վրաստանում հայ և վրացի մասնագետների միջև քննարկումները շարունակվում են, որպեսզի մի լուծում գտնեն խցանումը վերացնելու ուղղությամբ: Նախարարության մամուլի և հասարակայնության հետ կապերի բաժնի ներկայացուցիչը նաև ասաց, որ նախապես հայտարարել են, որ անցակետը փակ է, սակայն բեռնափոխադրողները գնացել են:
Նշենք, որ այս անցակետը մեծ մասամբ օգտագործվում է հայկական բեռնափոխադրումների համար և վերջին երկու տարվա ընթացքում են նմանատիպ խնդիրներ առաջանում: Նախնական տեղեկությունների համաձայն` Վերին Լարսի անցակետում խցանված են «Ապավեն» միջազգային բեռնափոխադրող ընկերության բեռնատարները և Հայաստանի միջազգային փոխադրողների ասոցիացիայի փոխադրողների բեռնատարները:
