Ինչպես հաղորդում է RBC-ն, մի խումբ ընդդիմադիր առաջնորդներ պատրաստվում են դատի տալ Ռուսաստանի վարչապետ Վլադիմիր Պուտինին այն բանի համար, որ վերջինս «Զրույց Վլադիմիր Պուտինի հետ. շարունակություն» հաղորդման ժամանակ մեղադրել էր ընդդիմադիրներին, որ նրանք` «Նեմցովը, Ռիժկովը, Միլովը և մյուսները գումար են ուզում»:
«Փող և իշխանություն՝ ահա թե ինչ են նրանք ուզում: Ժամանակին` 90-ականներին, նրանք Բերեզովսկու և բանտերում գտնվող մի շարք մարդկանց հետ գողացել են միլիարդներ: Նրանց կերակրատաշտից հեռացրին, նրանք մի քիչ դիմացան, հիմա ցանկանում են վերադառնալ և լցնել գրպանները»:
«Եթե մենք թույլ տանք դա անել, նրանք միայն միլիարդներով չեն սահմանափակվի, ամբողջ Ռուսաստանը կվաճառեն»,- ասել է Պուտինը:
«Պուտինի արտահայտությունները կրում են բացահայտ սուտ և զրպարտիչ բնույթ: Բոլոր նրանք, ում անունները նշված են այդ արտահայտություններում, պատրաստվում են դիմել դատարան»,- ասված է «Հանուն Ռուսաստանի` առանց ամենաթողության և կաշառակերության» նորաստեղծ կուսակցության հայտարարության մեջ:
Երեկ էլ նույն ոգով հանդես են եկել Միխայիլ Խոդորկովսկու պաշտպանները, որոնք այն արտահայտության համար, թե «գողը պետք է նստի բանտում»` ասված Խոդարկովսկու հասցեին, Ռուսաստանի վարչապետին մեղադրել են դատարանի վրա ճնշում գործադրելու մեջ:
Հիշեցնենք, որ երեկ Մոսկվայի Խոմովնիչեսկի դատարանը պետք է որոշում կայացներ Խոդորկովսկու «երկրորդ գործի» հետ կապված, սակայն դատական նիստն անսպասելիորեն հետաձգվել էր մինչև դեկտեմբերի 27-ը` առանց պատճառները նշելու:
