Հայաստանում կոռուպցիայի ընկալման համաթվի (ԿԸՀ) արժեքը չի փոփոխվել, և ինչպես նախորդ, այնպես էլ այս տարի 2.6 է: Այսօր լրագրողների հետ հանդիպմանը «Թրանսփարենսի Ինթերնեշնլ» կազմակերպության գործադիր տնօրեն Վարուժան Հոկտանյանը տեղեկացրեց, որ Հայաստանը այս տարի ԿԸՀ-ի ցուցանիշով 183 երկրների շարքում զբաղեցնում է 129-133-րդ տեղերը (անցած տարի Հայաստանը 178 երկրների շարքում 123-126-րդ տեղերում էր)` Դոմինիկյան Հանրապետության, Հոնդուրասի, Ֆիլիպինների և Սիրիայի հետ:
Այս տարի նախկին ԽՍՀՄ երկրներից ԿԸՀ ցուցանիշով առաջընթաց է գրանցել միայն Վրաստանը (4.1), իսկ մյուս հանրապետությունները, ինչպես նաև Թուրքիան ու Իրանը, նախորդ տարվա համեմատ առաջընթաց չեն գրանցել: Մասնավորապես, Ադրբեջանում, Ռուսաստանում և Բելառուսում ԿԸՀ-ն 2.4 է, Տաջիկստանում և Ուկրաինայում` 2.3, Իրանում` 2.7, Թուրքիայում` 4.2:
«Առավել մտահոգիչ է այն, որ մեզ մոտ կոռուպցիան շարունակում է համակարգային բնույթ կրել»,- ասաց Վ. Հոկտանյանը` նշելով, որ այն երկրներում, որտեղ ԿԸՀ արժեքը 3-ից ցածր է, կոռուպցիան ունի համակարգային բնույթ, լուրջ հիմնախնդիր է համարվում 3-5 տիրույթը: ԿԸՀ-ն չափվում է 10 բալանոց սանդղակով:
Ըստ բանախոսի` աշխարհում չկան բացարձակ կոռումպացված և բացարձակ մաքուր երկրներ: Կոռուպցիան համակարգային բնույթ է կրում նաև նախկին խորհրդային երկրներում` բացառությամբ մերձբալթյան հանրապետությունների և Վրաստանի:
Ինչպես ասաց Վ. Հոկտանյանը` ողջ աշխարհում տեղի ունեցող բողոքի ցույցերի հիմնական դրդապատճառը կոռուպցիոն և տնտեսական անկայունությունն է, և քաղաքացիները նմանատիպ ցույցերով հայտնում են իրենց բողոքը` ցույց տալով, որ իրենց քաղաքական առաջնորդները և պետական հաստատությունները բավարար չափով թափանցիկ և հաշվետու չեն իրենց:
ԿԸՀ արժեքը 5-ից պակաս է ցուցակում ընդգրկված երկրների ավելի քան 2/3-ում: ԿԸՀ ամենաբարձր արժեք ունեցող երկիրը Նոր Զելանդիան է (9.5), որին հաջորդում են Ֆինլանդիան և Դանիան (երկուսն էլ` 9.4): Աղյուսակը ԿԸՀ 1.0 արժեքով եզրափակում են Սոմալին և Հյուսիսային Կորեան: