Հանրապետության մանկավարժական դարբնոցի իննսուն տոկոսը կանայք են. երեք ամիս շարունակ հանրապետության ուսուցիչների աշխատավարձերը բռնագանձվում են տնօրենների կողմից: Այսօր կայացած մամուլի ասուլիսում այս մասին հայտարարեց հանրապետության գլխավոր մարքսիստ Դավիթ Հակոբյանը:
«Բռնագանձումները հաճախ հասնում են երեսուն տոկոսի, իսկ ԿԳՆ-ի կողմից` ոչ մի արձագանք: Ինձ են դիմում թիվ 127 ավագ դպրոցի ուսուցիչներ, որոնցից մեկը լացակումած, ստորացված` ինձ ասում է, որ այնտեղ տնօրենը ըմբոստացողի դեմ բարոյահոգեբանական հաշվեհարդար է տեսնում, բարձր դասարանցիներին սովորեցնում է «քացով խփել» իր որովայնին, ուսուցչուհիների հարեմ է պահում` արտոնյալ կանանց ոհմակ, որոնց մեծ թվով դասաժամեր է հատկացնում:
Մյուսները, ովքեր ընդդիմանում են աշխատավարձերից թողնել տնօրենին, հրապարակավ ֆիզիկական հաշվեհարդարի են ենթարկում հենց միջանցքներում:
Անցած շաբաթ խնդրով դիմել եմ գլխավոր դատախազին` «նե օտվետա, նե պրիվետա»: Հասկացանք` պարտակիչ գործողություններ: Ես դիմում եմ նաև ՀՀ նախագահին»,- ասաց Մարքսիստական կուսակցության առաջնորդը` հավելելով, որ արատավոր է դարձել նաև դպրոցների տնօրենների հավաստագրման հանցավոր գործընթացը:
«Ինչպիսի կրիմինալ թափթփուկներ, հանցագործներ ասես` չեն նշանակվում տնօրենների պաշտոնում»,- նշեց Դավիթ Հակոբյանը:
Նա միաժամանակ տեղեկացրեց, որ վերոնշյալ դեպքը թիվ 127 ավագ դպրոցում տեղի է ունեցել անցած ուրբաթ, սակայն հրաժարվեց կոնկրետ ուսուցչուհու և տնօրենի անուններ նշել:
