Թուրքական Doğan լրատվական գործակալության փոխանցմամբ՝ Ֆրանսիայի սոցիալիստական կուսակցությունը ներկայացնող, հայկական ծագում ունեցող սենատոր Ֆիլիպ Կալտենբախը վերստին Սենատի օրակարգ է վերադարձրել Հայոց ցեղասպանության հերքումը քրեականացնող բանաձևը։
Այս տարվա սեպտեմբերին Ֆրանսիայում տեղի ունեցած ընտրությունների արդյունքներով փոխվել է Ֆրանսիայի Սենատի (խորհրդարանի վերին պալատ) կազմը։ Այժմ դրանում մեծամասնություն են կազմում ձախ կուսակցությունների ներկայացուցիչները։
Իսկ դա կարող է նպաստել հերթական անգամ Սենատի օրակարգում Հայոց ցեղասպանության հերքումը քրեականացնող օրինագծի ընդգրկվելուն, քանի որ նախորդ դեպքերում հենց ձախերն են մշտապես քվեարկել օրինագծի օգտին։
Բացի այդ, Ֆրանսիայի նախագահ Նիկոլա Սարկոզին այս տարվա հոկտեմբերի սկզբին Երևանում Թուրքիային սպառնացել էր մինչև տարեվերջ Հայոց ցեղասպանության չճանաչման դեպքում ընդունել Հայոց ցեղասպանության հերքումը քրեականացնող բանաձևը։
Հիշեցնենք, որ այս տարվա մայիսի 4-ին Ֆրանսիայի Սենատը երեք ժամ տևած քննարկումներից հետո մերժեց Հայոց ցեղասպանության հերքումը քրեականացնող օրինագիծը: Քվեարկության ժամանակ 196 սենատոր դեմ էր քվեարկել դրան, 74-ը՝ կողմ, իսկ 20-ը` ձեռնպահ: Արդյունքում, այդ նախագիծը դուրս մնաց Սենատի օրակարգից:
Այդ օրինագծի հաստատման դեպքում Ֆրանսիայում Հայոց ցեղասպանությունը ժխտողներին կսպառնար մինչև 5 տարվա ազատազրկում և 45.000 եվրո տուգանք:
Ի դեպ, Ֆրանսիայում Հայոց ցեղասպանությունը ճանաչող բանաձևեր ընդունվել են 1998, 2000 և 2001 թվականներին: Իսկ 2006 թվականի հոկտեմբերի 12-ին Ֆրանսիայի խորհրդարանի Ստորին պալատն ընդունեց (Հոլոքոսթի նման) Հայոց ցեղասպանությունը մերժողներին պատասխանատվության ենթարկելու օրինագիծը, որը ցայժմ չի վավերացվել Սենատի կողմից:
