Դեկտեմբերի 11-ին «Ավանգարդ Ֆոլկ» ակումբում տեղի կունենա «Դորիանս» ռոք խմբի առաջին՝ Fly ձայնասկավառակի շնորհանդեսը։ Այս մասին «Առաջին լրատվական»-ի հետ զրույցում ասաց «Դորիանս» խմբի վոկալիստ Գոռ Սուջյանը։
Ձայնասկավառակը բաղկացած է 10 հեղինակային երգից, որից 8-ի երաժշտության հեղինակը Գ. Սուջյանն է, խոսքերի հեղինակը՝ Վարդան Զադոյանը։ «Մի գործը գրել ենք ամբողջ խմբով, մյուսի հեղինակն էլ Արմեն Մարտիրոսյանն է»,- ասաց երգիչը։
Ձայնասկավառակի բոլոր երգերը, բացառությամբ «Ես կուլամ»-ի, անգլերենով են։
Ձայնասկավառակի ձայնագրման աշխատանքները, ըստ Գոռի, տևել են 1-1,5 տարի, քանի որ առաջին ձայնասկավառակն էր, ու բացի այդ, շատ մանրակրկիտ են աշխատել՝ «մաքսիմում որակ ստանալու համար»։
Նրա խոսքով, ձայնասկավառակում հավաքված երգերը տարբեր են ժանրային առումով, սակայն ընդհանուր են՝ ասելիքի իմաստով: «Երգերն ավելի շատ կապված են մարդկանց էմոցիաների արտահայտման հետ։ Մարդիկ հիմա մի տեսակ ավելի ռոբոտացել են»,- նշեց Գ. Սուջյանը։
Շնորհանդեսը բաղկացած է լինելու երկու մասից. առաջին մասը տեղի կունենա ակումբի փոքր դահլիճում, որտեղ կիրականացվի ձայնասկավառակի շնորհանդեսը և վաճառքը, ինչպես նաև ցուցահանդես, ուր կներկայացվեն աշխատանքներ`նվիրված «Դորիանս» խմբին։ «Ցույց կտվի, թե «Դորիանսի» արվեստն ինչպես է ազդել մյուսների ստեղծագործությունների վրա»,- նշեց նա։
Հարցին՝ արդյոք «Դորիանսի» հետ ելույթ կունենա՞ն այլ խմբեր ևս, Գ. Սուջյանը պատասխանեց, որ այս պահին ճշգրտումներ են կատարվում։
Շնորհանդեսի երկրորդ հատվածում ակումբի մեծ դահլիճում տեղի կունենա խմբի մենահամերգը:
Fly-ի ձայնագրման աշխատանքները կատարվել են Երևանում՝ «Շարմ» ընկերության ստուդիայում, միքսվել՝ Բրյուսելում, մաստերինգն արվել է Փարիզում՝ «Երևան» փրոդաքշընի աջակցությամբ։
«Դորիանս» խումբն ստեղծվել է 2008 թ.։
