Երևանի քաղաքապետարանի տեղեկատվության և հասարակայնությն հետ կապերի վարչությունից «Առաջին լրատվական»-ին տեղեկացնում են, որ Երևանի քաղաքապետ Տարոն Մարգարյանի հրավիրած խորհրդակցության ընթացքում քննարկվել են համատիրությունների աշխատանքի արդյունավետության բարձրացման, 2012թ. կառավարման միասնական մոդելի և աշխատանքային նոր ծրագրի ներդրման, ինչպես նաև ոլորտին առնչվող մի շարք այլ հարցեր։
Խորհրդակցությանը մասնակցել են քաղաքապետի տեղակալները, վարչական շրջանների ղեկավարներն ու կոմունալ բաժինների պետերը, ինչպես նաև մայրաքաղաքի առավել կայացած համատիրությունների ղեկավարները:
Խորհրդակցության սկզբում Երևանի քաղաքապետը նշել է, որ այս ոլորտի կայացումն անհրաժեշտ է իրականացնել միասնական ջանքերով՝ դրսևորելով սրտացավություն և մեծ հոգատարություն:
Նշվել է, որ լավ արդյունքներ ցուցաբերած մի շարք համատիրություններին զուգահեռ, մայրաքաղաքում քիչ չեն նաև իրենց պարտականությունների մեջ թերացող, երբեմն նաև անբավարար գործունեություն ծավալող համատիրությունները, ինչն անընդունելի է և հարուցում է բնակչության արդարացի դժգոհությունը:
«Այսօր մեր շատ համատիրություններ հավաքագրված միջոցների 70-80 տոկոսը հատկացնում են աշխատավարձի ֆոնդին և միայն 20-30 տոկոս մնացյալ միջոցներով են իրականացնում իրենց պարտականությունները, այնինչ բնակիչների սպասելիքներն արդարացնելու համար անհրաժեշտ է ունենալ ճիշտ հակառակ պատկերը:
Իրենց պարտականությունների մեջ թերացող և ցածր օգտակար գործողության գործակից ունեցող համատիրություններ մեզ պետք չեն: Դա է պատճառը, որ հաջորդ տարեսկզբից մենք անցնելու ենք համատիրությունների խոշորացման մոդելին`փոքր համատիրությունները միացնելով մեծերին»,- նշել է քաղաքապետ Տ. Մարգարյանը։
Համատիրությունների ղեկավարները ևս կողմ են արտահայտվել համատիրությունների խոշորացմանը` ընդգծելով, որ այդպիսով իրավամբ կհաջողեն ապահովել սեփական ծախսերի մասով քաղաքապետի նախանշած ծախսային հարաբերակցությունը:
Տ. Մարգարյանը վարչական շրջանների ղեկավարներին և կոմունալ բաժինների պետերին հանձնարարել է մեծ ուշադրություն դարձնել համատիրությունների գործունեությանը` խստորեն հետևելով բյուջեի ձևավորմանն ու նախատեսված ծախսերի իրականացմանը, պարտադիր նորմերի պահպանմանն ու բնակչությանը ներկայացվող պարբերական հաշվետվություններին:
«Մենք պետք է ունենանք մեկ ընդհանուր ոճով գործող համատիրություններ, որպեսզի ակնհայտ երևան ձեռքբերումներն ու թերացումները: Այդ առումով 2012թ. պետք է լինի բեկումնային»,- ընդգծել է Երևանի քաղաքապետը։
Հանձնարարվել է մեկամսյա ժամկետում ինտենսիվ աշխատանքներ տանել համատիրությունների խոշորացման մասին բնակիչներին իրազեկելու և բուն խոշորացման մասով քայլեր ձեռնարկելու ուղղությամբ:
