Զվարճանքային ինդուստրիան Հայաստանում շատ է զարգացած, և դա նորմալ չէ: Այսօր կայացած մամուլի ասուլիսում նման տեսակետ հայտնեց երաժիշտ Լիլիթ Պիպոյանը:
«Պետության պատվերն այս բնագավառում շատ թույլ է, հիմա ֆինանս ունեցողն է թելադրում ու պատվիրում: Այս երևույթն առավել արմատացել և ակնհայտ է դարձել հատկապես վերջին 4-5 տարիներին»,- նկատեց նա՝ ավելացնելով, որ անձամբ ինքը շատ է հոգնել երաժշտական դաշտում առկա աղմուկից և նույնանման երաժշտությունից:
Ասուլիսին ներկա ջազմեն Վահագն Հայրապետյանն իր հերթին ընդգծեց, որ շոու-բիզնեսն ու արվեստը պետք է հստակորեն տարանջատվեն:
«Ցանկալի է, որ աղմուկի փոխարեն երաժշտություն լինի, որ երաժիշտները բեմի վրա կենդանի երգեն ու նվագեն»,- նշեց նա:
Ինչպես նշեց ջազմենը, մենք՝ հայերս, օպերային հին արվեստ ունեցող ազգ ենք, սակայն այսօր բավարար միջոցներ չունենալու պատճառով պետությունը չի կարողանում ֆինանսավորել իրական արվեստի ներկայացուցիչներին՝ օպերային երաժիշտներին, սիմֆոնիկ նվագախմբերին, որոնք կարող են Հայաստանը արտասահմանյան բեմերում ներկայացնել ըստ արժանվույն:
«Ժամանակին կային մարդիկ՝ մեկենասներ, ովքեր նման դեպքերում սատարում էին պետությանը, անհրաժեշտ ֆինանսական աջակցություն դրսևորում»,- հիշեցրեց Վահագն Հայրապետյանը՝ հավելելով, որ հիմա նման բան գրեթե չկա:
Ասուլիսի վերջում երկու երաժիշտներն էլ խոստովանեցին, որ մեկական անգամ նվագել են հարսանիքների ժամանակ, սակայն շատ մեծ հաճույքով, քանի որ այդտեղ բացառապես բարձրաճաշակ երաժշտություն է հնչել:
Վահագն Հայրապետյանը նաև տեղեկացրեց, որ Գաֆեսճյան արվեստի կենտրոնի հատուկ միջոցառումների սրահում դեկտեմբերի 9-ին և 16-ին համերգներ է ունենալու, իսկ Լիլիթ Պիպոյանի համերգը նույն վայրում նախատեսված է դեկտեմբերի 10-ին:
