Սիրիայի նախագահ Բաշար Ալ-Ասադը իր երկիրը գլորում է քաղաքացիական պատերազմի անդունդը: Այս մասին, ինչպես հաղորդում է Associated Press-ը, հայտարարել է ԱՄՆ նախկին պետքարտուղար Կոնդոլիզա Ռայսը` մեկնաբանելով Սիրիայում տեղի ունեցող իրադարձությունները: Մասնավորապես նա քննդատության է ենթարկել իրավապահ մարմինների և ոստիկանության կողմից ցուցարաների նկատմամբ բռնությունները:
Խոսելով Ասադի մասին` Ռայսը նշել է, որ Սիրիայի նախագահը «դադարել է լինել Միացյալ Նահանգների բարեկամը», և նրա տապալումը կլիներ սիրիացի ժողովրդի «հզոր նվաճումը»: Բացի այդ, նա կոչ է արել խստացնել Սիրիայի գործող վարչակարգի դեմ միջոցառումները:
Իր հարցազրույցում Ռայսը անդրադարձել է նաև ՄԱԿ-ի ԱԽ քվեարկությանը` հայտարարելով, որ չնայած ՌԴ-ի և Չինաստանի վետոյին` ԱՄՆ-ը պետք է ուժեղացնի ազդեցությունը Սիրիայի վրա ինչպես դաշնակիցների հետ, այնպես էլ միակողմանի կերպով: Ռայսը նշել է, որ անհրաժեշտ է ավելի սերտ աշխատանքներ տանել Սիրիայի ընդդիմության հետ: