Հայաստանի արդյունաբերողների և գործարարների միության նախագահ Արսեն Ղազարյանը «Առաջին լրատվական»-ի հետ զրույցում հայ-վրացական գործարար հարաբերությունները դրական գնահատեց: Նրա խոսքով, Վրաստանը ՀՀ ամենամոտ շուկան է, որտեղ տարին տարվա վրա ապրանքների ավելի մեծ արտահանում ենք իրականացնում, Վրաստանն աշխարհին կապող մեր միակ երկաթգծային հիմնական մայրուղին է և դրա նավահանգիստները մեզ համար շատ կենսական են բեռների տրանզիտ փոխադրումը կազմակերպելու համար:
Նոյեմբերի վերջին Սերժ Սարգսյանի Վրաստան կատարելիք պաշտոնական այցի շրջանակներում ծրագրվում է վրաց-հայկական գործարար համաժողով կազմակերպել Թբիլիսիում: Ա. Ղազարյանը հայտնեց, որ ներկայացնելու են ծրագրերը, գրավիչ ճյուղերը, մշակելու են տեսական համագործակցությունը, իսկ ապագայում նաև խորացնելու են ինտեգրացիան երկու շուկաների միջև:
«Վրաստանում բիզնես-միջավայրն իրոք արմատապես փոխվել է, պետական կամ քրեածին բանդիտիզմ չկա, նախկինում պետական մարմինների կողմից իրականացվող անիմաստ ռեկետ գոյություն չունի»,- նշեց Ա. Ղազարյանը`հավելելով, որ այնուամենայնիվ չի գտնում, որ հայկական բիզնեսը խելացնոր փախչում է Վրաստան: Ըստ նրա՝ հայկական կայացած խոշոր առևտրային իրացում իրականացնող մատակարար համակարգերը Վրաստանում լուրջ շուկա են գտել, հաջողությամբ այդտեղ էլ են գործում:
Ա.Ղազարյանն ընդգծեց, որ միությունը խրախուսում է, եթե մայր ձեռնարկությունը Երևանում պահպանելով, հայկական ընկերությունը նաև վրացական շուկայում է ծավալվում. «Իսկ այն լուրերը, որ բիզնեսը փակում, գնում են, դա ավելի շատ ուռճացման հետևանք է, քան իրականության մեջ գոյություն ունի»: