Քչերն են անդրադարձել այն հարցին, թե ինչու Երևանի կոնյակի գործարանը շշերի վրայից հանեց Արարատ լեռով տարբերանշանը, արձագանքներ չեղան, ոչ մեկ չնկատեց, որ ամեն խաչմերուկում տեղադրված փողոցների ցուցանակների տակ պատկերված Երևանի կոնյակի գործարանի տարբերանշանն այլևս չգիտես որտեղից ու ինչի համար հառնող փյունիկն է, և հանկարծ «Մուլտի գրուպի» Երևանի կոնյակի-գինու-օղու «Արարատ» կոմբինատը սկսում է արտադրել «Kremlin award» անվանումով կոնյակ, որը լինելու է 10,15 և 20 տարվա հնեցման:
Այդ մասին պայմանագիր է ստորագրվել Երևանի «Արարատ» կոմբինատի և Ռուսաստանի նախագահի գործերի կառավարչության ենթակայության տակ գտնվող «Կրեմլյովսկայա» առևտրի տան միջև: Այս մասին հայտնել է նոր «Կրեմլյովսկայա» ապրանքանիշի շնորհանդեսի ժամանակ Առևտրի տան ղեկավար Վլադիմիր Պեշկինը:
Այս կոնյակի վաճառքով զբաղվելու է «Լուդինգ» ընկերությունը, որի ղեկավարներից մեկը` Արա Խաչատրյանը, անցած ուրբաթ օրը սպանվել էր Մոսկվայի կենտրոնում:
Առաջին տարվա ընթացքում նախատեսվում է վաճառել այս կոնյակի 180-200 հազար շիշ, հետագայում ավելացնել այդ թիվը` տարեկան մինչև 400-450 հազար շիշ:
Նախատեսվում է նաև 7-ամյա հնեցման կոնյակի արտադրություն: Բացի այդ, պայմանագրով, «Կրեմլյովսկայա» առևտրի տունն իրականացնելու է վերահսկողություն կոնյակի արտադրության բոլոր փուլերում` սկսած խաղողի հավաքելուց մինչև վերջնական արտադրանքի ստանալը:
Այս ամսին հաղորդում է РИА-Новости գործակալությունը:
ՌԴ նախագահի աշխատակազմի ղեկավար Վլադիմիրը Կոժինն էլ նշել է, որ «յուրաքանչյուր երկիր ունի իր խորհրդանիշը, և երբ մենք արտասանում ենք Հայաստան, հիշում ենք Արարատը, ընդ որում, ոչ միայն որպես աշխարհագրական հասկացություն, այլ նաև որպես առևտրային նշան»: ««Արարատ» գործարանը Հայաստանի խորհրդանիշներից մեկն է, և ես հույս ունեմ, որ մեր համագործակցությունը կլինի երկարատև»,- ասել է Կոժինը:
