Այսօր Ուսանողության միջազգային օրն է: Տարբեր երկրներում արդեն ձևավորված են տոնը նշելու ավանդույթներ: Օրինակ`ԱՄՆ-ում, Դանիայում այս օրը ուսանողներն աշխատում են զվարճանալ ինչպես հարկն է, վայելել ամենաթանկ ուտեստները և խմիչքները: Թեև Հայաստանում շատերը չգիտեն օրվա նշանակության մասին, բայց մի շարք պետական ուսումնական հաստատություններում նոյեմբերի 17-ը տոնվում է միջոցառումների շարքով:
Ինչպես «Առաջին լրատվական»-ին տեղեկացրեց ՀՊՃՀ ուսանողական խորհրդի նախագահ Կարապետ Թորչյանը, ընթացիկ շաբաթը Հայաստանի պետական ճարտարագիտական համալսարանում կարևորվել է միջոցառումների շարքով, որոնք ունեցել են ուսումնակրթական բնույթ: Այս տարի բուհի ուսխորհուրդը փորձել է ձեռնպահ մնալ մարզամշակութային միջոցառումներից և հիմնական շեշտը դրել է կրթական բնույթի լոկալ համալսարանական միջոցառումների վրա:
«Այս շարքում ունեցանք մի քանի հանդիպումներ, որոշակի դասընթացներ նույնպես ունեցանք ուսանողների հետ: Բուհում ընթացիկ շաբաթվա ընթացքում կրթական բարեփոխումների հետ կապված ոլորտի ներկայացուցիչների հետ մի քանի հանդիպումներ եղան, որի ժամանակ ներկայացվեցին, թե ինչ է արվում վերջին ժամանակաշրջանում»,- մեկնաբանեց Կ. Թորչյանը`տեղեկացնելով, որ միջոցառումների շարքը բավականին հագեցած է եղել: Ըստ ՀՊՃՀ ուսանողական խորհրդի նախագահի` այսօր այդ միջոցառումներն ամփոփել են ուսանողներին շնորհավորելով, որի ընթացքում ներկայացվել են պրեզենտացիաներ ուսանողության և ուսանողության հասարակական աշխատանքի վերաբերյալ:
Անդրադառնալով Հայաստանում ուսանողության խնդիրներին`Կարապետ Թորչյանը նշեց, որ դրանք բազմաթիվ են և կրում են սոցիալական բնույթ: «Ուսանողների առաջին խնդիրը վարձավճարներն են, համապատասխան ծրագրեր են անհրաժեշտ, որ կբերեն նրան, որ ուսումնական կրթական գործընթացը լինի մատչելի: Մենք քննարկել ենք նաև այդ հարցը: Մեր կողմից բարձրաձայնվեց ամենաընդունելի տարբերակը. ուսանողական վարձերի երկարաժամկետ վարկավորումը, որը հնարավորություն կտա սոցիալապես անապահով վիճակում գտնվող ուսանողներին չզրկվել կրթության իրավունքից և հետագայում, մասնագիտական կարողություններն օգտագործելով, աշխատել և վերադարձնել վարկը»,- մանրամասնեց ուսխորհրդի նախագահը`հավելելով, որ ուսանողներին պետք է ներգրավել բոլոր ուսումնական գործընթացներում:
Նշենք, որ 1946 թվականի նոյեմբերի 17-ին Պրահայում Ուսանողների համաշխարհային կոնգրեսը այդ օրը հռչակել է Ուսանողության միջազգային օր:
