Nokia ընկերությունը մտադիր է թողարկել Windows 8 օպերացիոն համակարգով աշխատող պլանշետ: Այդ մասին Les Echos պարբերականին տված հարցազրույցի ժամանակ ասել է Nokia-ի ֆրանսիական ստորաբաժանման ղեկավար Փոլ Ամսելեմը:
Ամսելեմը չի բացահայտել սարքավորման մանրամասները, սակայն հայտնել է, որ պլանշետը կցուցադրվի 2012 թվականի հունիսին: Ներկայումս Windows 8 գտնվում է մշակման փուլում, սակայն սպասվում է, որ այն վաճառքի կհանվի 2012 թվականի աշնանը:
Հարցազրույցում Ամսելենը նաև անդրադարձել է Nokia-ի սմարթֆոններին: Հոկտեմբերի վերջին Windows Phone 7 օպերացիոն համակարգի հիման վրա աշխատող Lumia 800 սարքը նա համեմատել է BMW-ի հինգերորդ սերիայի ավտոմեքենաների հետ` ավելացնելով, որ նրանք թողարկելու են «երրորդ սերիայի» և «յոթերորդ սերիայի» սմարթֆոններ:
Nokia-ն համարվում է բջջային սարքավորումներ արտադրող խոշորագույն ընկերություններից մեկը, որը իր արտադրության մեջ չունի պլանշետներ: 2010 թվականին ԶԼՄ-ները հայտնել էին ընկերության մտադրությունների մասին` Meego պլատֆորմի վրա թողարկել պլանշետներ, սակայն Nokia-ի միակ սարքավորումը այդ պլատֆորմում դարձավ Nokia N9-ն :
