Այսօր Ազգային ժողովում բյուջեի քննարկումների ժամանակ առողջապահության նախարար Հարություն Քուշկյանը հավաստիացրեց, թե բյուջեից հատկացվող բոլոր գումարները հստակորեն ուղղվում են նախատեսվող ծրագրերին:
«Բյուջեի հաշվին այլ ծրագրեր վերջին 4 տարում չեն կատարվել: «Բարգավաճ»-ի կողմից հանրապետությունում իրականացվող առողջապահական աջակցությունը կատարվում է միայն «Ծառուկյան» հիմնադրամի հաշվին»:
Հ. Քուշկյանը տեղեկացրեց, որ 2012-ի բյուջեով ոլորտին հատկացվող գումարներն ավելացել են 6%-ով՝ կազմելով 65.8 մլրդ դրամ: Վարկային միջոցների 3 մլրդ դրամ ավելացում է սպասվում, որն ուղղվելու է մարզերում կապիտալ ծախսերին:
Նախարարը հայտնեց, որ 2012-ին Գյումրիում շահագործման կհանձնվի բժշկական կենտրոնը, կսկսվի Վանաձորի, Կապանի, Մեղրիի և այլ վայրերում հիվանդանոցների վերականգնումը, որոնք 40-50 տարի չեն վերակառուցվել և վերազինվել: Մի քանի օրից շահագործման կհանձնվի Գավառի հիվանդանոցը, Երևանում կկառուցվի գերժամանակակից օնկոլոգիական կենտրոն:
Ընդհանուր առմամբ, ըստ Հ. Քուշկյանի, բյուջետային հատկացումները կպահպանվեն 2011 թ. մակարդակին, սակայն ծրագրերի ընթացքին դա չի խոչընդոտի:
Նա նշեց, որ հիմնական թիրախը կմնա բուժօգնության առաջնային օղակի զարգացումը: Բժիշկների աշխատավարձը հաջորդ տարի կկազմի միջինը 80 հազար դրամ, բուժքույրերինը՝ 55 հազար:
