Երևանի նորընտիր քաղաքապետ Տարոն Մարգարյանն այսօր լրագրողների հետ զրույցում հայտարարեց, թե կադրային քաղաքականությունը ինքնանպատակ չի լինում. «Քաղաքապետարանում ունենք պրոֆեսիոնալ թիմ, մնում է, որ այդ պրոֆեսիոնալ թիմին ոգևորենք, և այն ոգին լինի, այն աշխատասիրությունը, որ մեր ծրագրերը հասցնենք ավարտին»:
Քաղաքապետի պաշտոնում իր ընտրությունը Տ. Մարգարյանը պայմանավորեց ՀՀԿ խորհրդում և Երևանի ավագանու ՀՀԿ խմբակցությունում իր թեկնածության առաջադրմամբ, իսկ թե ինչու Գագիկ Բեգլարյանի հրաժարականից հետո չառաջադրեց իր թեկածությունը, Տ. Մարգարյանը կրկին մեջբերեց ՀՀԿ խորհրդի որոշումը՝ պաշտպանել Կարեն Կարապետյանի թեկնածությունը:
«Երևանն ավելի բարեկարգ դարձնելու համար աշխատանք է պետք կատարել: Պատրաստակամություն կա ծրագրերն իրականացնելու»,- ասաց Տ. Մարգարյանը՝ միաժամանակ նշելով, որ ուսանողական տարիներից հետո տրանսպորտով չի երթևեկել, բայց դեմ չէ:
Նա հայտնեց, որ շարունակվելու է լքյալ և ապօրինի կրպակների ապամոնտաժումը, կա հստակ քանակ, գործընթացն ավարտական փուլում է, իսկ գործող կրպակներին չեն անդրադառնալու. «Անդրադառնալու ենք նաև Աբովյան փողոցի այն կառույցներին, որոնք ունեն փաստաթղթեր, և բանակցելով սեփականատերերի հետ՝ փորձելու ենք Աբովյան փողոցի մայթերը հանձնել բնակիչներին»:
Անդրադառնալով Երևանի քաղաքապետի առաջին տեղակալի հարցին, Տ. Մարգարյանը հայտարարեց, որ, ըստ Երևանի մասին օրենքի, թեկնածուն պետք է առաջադրի Երևանի ավագանին. «Այդ հարցը դեռ չենք քննարկել»: