France-Presse գործակալության փոխանցմամբ՝ Իրանի ԱԳՆ-ն այսօր հերքել է Բահրեյնի իշխանությունների մեղադրանքը, թե Իրանն ահաբեկչական ակցիաներ է նախապատրաստում այդ կղզի պետության տարածքում։ Այս մասին հայտարարել է Իրանի փոխարտգործնախարար Հուսեին Ամիր Աբդոլահիանը, որը նշել է.
«Բահրենյան այդօրինակ անհիմն մեղադրանքները մշակել է ԱՄՆ-ը։ Իրանատյացության քաղաքականության շարունակությունն արդյունավետ չէ, ուժային ճնշման աճը չի հանգեցնելու հարցի լուծմանը»։
Հիշեցնենք, որ երեկ Բահրեյնի իշխանությունները ահաբեկչական ակտեր նախապատրաստելու մեղադրանքով ձերբակալել էին 5 մարդու։ Նրանք մեղադրվում են Բահրեյնի ՆԳՆ-ի, Բահրեյնում գտնվող Սաուդյան Արաբիայի դեսպանատան և Բահրեյնն Արաբական թերակղզուն կապող ավտոմոբիլային կամրջի դեմ ահաբեկչություններ պատրաստելու մեջ։ Բահրեյնի իշխանությունների կարծիքով՝ նրանց գործուղել է Իրանը։
