ԵԱՀԿ Մինսկի խմբի կազմում փոփոխություններ կատարելու մասին խոսակցություններ կան դեռ հունիսից, երբ խոսվում էր, որ եթե Կազանում հաջողություններ չգրանցվեն, Մինսկի խումբը գուցեև վերանայի իր մոտեցումները, նոր ձևաչափ առաջարկի, ուր ԵՄ-ն կարող է ավելի մեծ դերակատարություն ունենալ: «Առաջին լրատվական»-ի հետ զրույցում այս մասին հայտարարեց Մանվել Սարգսյանը` անդրադառնալով Եվրախորհրդարանի անդամ Քրիստիան Վիգենինի այն հայտարարությանը, որ ֆրանսիացի համանախագահ Բեռնար Ֆասյեն կարող է փոխարինվել ԵՄ արտաքին հարաբերությունների և անվտանգության քաղաքականության հարցերով գերագույն հանձնակատար Քեթրին Էշթոնով:
«Այս մասին խոսակցություններ և առաջարկներ կան դեռ վաղուց: Սակայն կես տարի է, այս մասին որևէ նորություն չկար, և եվրոպացի պաշտոնյայի այս հայտարարությունները կարելի է որոշակի կոնկրետացման փորձ համարել: Իհարկե, դժվար է ասել, կլինի՞ ԵԱՀԿ Մինսկի խմբի կազմում նման փոփոխություն, թե ոչ, որովհետև դա պետք է համաձայնեցվի նաև հակամարտող կողմերի` Հայաստանի և Ադրբեջանի հետ: Ի վերջո, հենց հակամարտող կողմերը նման համաձայնություն պետք է տան»,- նկատեց փորձագետը:
Մանվել Սարգսյանի կարծիքով՝ խոսվում է հատկապես ֆրանսիացի համանախագահի փոփոխության մասին, քանի որ ԱՄՆ-ը և Ռուսաստանն ինքնին խոշոր ուժային կենտրոններ են` ներկայացված ԵԱՀԿ-ում, մինչդեռ ԵՄ-ն, որպես առանձին միավոր, այդ կառույցում մինչ այժմ ներկայացված չէ:
Նշենք, որ Հայաստանի նախագահ Սերժ Սարգսյանի հետ հանդիպումից հետո Եվրախորհրդարանի անդամ Քրիստիան Վիգենինը նշել էր, որ իրավիճակը կայունացնելու ձգտումը ԵՄ-ին հանգեցնում է ղարաբաղյան հակամարտության կարգավորման գործընթացում առավել մեծ ներգրավվածության մտքին: «Մենք տեսնում ենք, որ ԵԱՀԿ Մինսկի խմբի ձևաչափը տարիներ շարունակ որևէ արդյունքի չի հանգեցնում, և այս կապակցությամբ ինչ-որ բան պետք է տեղի ունենա, փոփոխվի»,- ասել է Վիգենինը:
Նրա խոսքով՝ մասնավորապես առաջարկվում է ԵԱՀԿ ՄԽ ֆրանսիացի համանախագահին փոխարինել ԵՄ ներկայացուցչով, և բացառված չէ, որ այդ ներկայացուցիչը դառնա ԵՄ արտաքին հարաբերությունների և անվտանգության քաղաքականության հարցերով գերագույն հանձնակատար Քեթրին Էշթոնը: