Ռուսական Regnum լրատվական գործակալության փոխանցմամբ՝ Վրաստանում այսպես կոչված «ռեզերվային» զինված խմբավորումների ստեղծումը դարձել է վրացական ընդդիմության և ԶԼՄ-ների ուշադրության առարկան։
Մասնավորապես, «Սաքարթվելոս ռեսպուբլիկա» («Վրաստանի Հանրապետություն») թերթում տվյալ խնդրի շուրջ հրապարակվել է «Ինչո՞ւ են Վրաստանում ստեղծվում ռեզերվային զինված խմբավորումներ» խորագրով հոդվածը, որում ասվում է.
«Այդ ոչ պաշտոնական ստորաբաժանումները, որոնք իշխանությունների հրահանգով ստեղծվում են Վրաստանի շրջաններում, կախված տվյալ բնակավայրի մեծությունից՝ ունեն 10-100 փորձառու մարտիկներ ու հանցավոր տարրեր։ Այդ խմբավորումների ստեղծման պատճառներն անհայտ են մնում հասարակության համար, սակայն լուրեր են շրջանառվում, որ այդ ամենը կապված է քաղաքական արենայում վրացի գործարար Բիձինա Իվանիշվիլիի հայտնվելու հետ։
Մեզ հետ զրույցում «Պաշտպանի՛ր Վրաստանին» շարժման ներկայացուցիչ Կախա Միկայան հայտնեց, որ զինյալներից և հանցագործներից բաղկացած այդ խմբավորումները պատրաստություն են անցնում Սենակի ռազմաբազայում և «ծառայության» համար ստանում որոշակի պարգևատրություն։ Այդ ամենը կապված է Իվանիշվիլիի հետ։
«Ազատ դեմոկրատներ» կուսակցության ներկայացուցիչ Գիյա Ալասանիան նշել է, որ ողջ Վրաստանի մասշտաբով պլանավորված է ստեղծել 25,000 այդպիսի մարդկանցից բաղկացած խմբավորումներ. «Այժմ ընթանում է այդ մարդկանց հավաքագրման գործընթացը։ Ընտրվածներին բաժանում են հանդերձանք, զենք և վճարելու են 300-ական լարի» (1 լարին հավասար է 0.58 դոլարի)»։
