Կաննում G20-ի գագաթնաժողովի ժամանակ նոյեմբերի 3-ին ԱՄՆ և Ֆրանսիայի նախագահների մամուլի ասուլիսին սպասող լրագրողները միանգամայն պատահաբար լսել են երկու նախագահների միջև անձնական խոսակցությունը: Այս մասին գրում է ֆրանսիական Pret sur images պարբերականը:
Որպես կանոն` այդպիսի հանդիպումները փակ դռների ետևում տեղի են ունեում «հերմետիկ» ռեժիմով. դրանք կազմակերպվում են այնպես, որպեսզի ոչ մի բառ հասանելի չդառնա մամուլին: Սակայն այս անգամ ֆրանսիացի կազմակերպիչների սխալը հանգեցրել է խոսակցության գաղտնիության տապալմանը:
Բանն այն է, որ լրագրողներին չէին զգուշացրել, որ ԱՄՆ և Ֆրանսիայի նախագահները առայժմ պատրաստ չեն մամուլի ասուլիսին: Լրագրողներն էլ, ցանկանալով ոչ մի բառ բաց չթողնել, անմիջապես միացրել են ձայնագրման սարքերը: Արդյունքում նրանք լսել են՝ ինչպես է Բարաք Օբաման Սարկոզիին մեղադրում այն բանում, որ նա ԱՄՆ-ին չի զգուշացրել, թե պատրաստվում է քվեարկել UNESCO-ում Պաղեստինի անդամակցության օգտին:
Այնուհետև խոսակցության ընթացքում հնչել է Իսրայելի վարչապետ Բենյամին Նեթանյահուի անունը: «Ես չեմ կարող այլևս տեսնել նրան, այդ սուտասանին,- ասել է Սարկոզին: «Դու հոգնել ես նրանից, իսկ ես դեռ ստիպված եմ մշտապես շփվել նրա հետ »,- նշել է Օբաման: Այնուհետև ԱՄՆ նախագահը խնդրել է իր ֆրանսիացի գործընկերոջը համոզել պաղեստինցիներին չափավորել իրենց սպասելիքները ՄԱԿ-ին անդամակցության հարցում:
