Ադրբեջանական Trend լրատվական գործակալության փոխանցմամբ՝ Վրաստանի խորհրդարանի խոսնակ Դավիթ Բաքրաձեն ամերիկյան The Washington Times-ին տված հարցազրույցի ժամանակ հայտարարել է, որ անդամակցության դեպքում Վրաստանը ՆԱՏՕ-ին չի ներքաշելու Ռուսաստանի դեմ պատերազմի մեջ.
«Մենք միակողմանի պարտավորություն ենք ստանձնել ուժի չկիրառման մասին։ Դրա համար էլ 5-րդ հոդվածի համատեքստում մենք խնդիր չենք հանդիսանա ՆԱՏՕ-ի համար՝ Վրաստանի ու Ռուսաստանի միջև զինված հակամարտության տեսանկյունից։
Այժմ այդ զինված հակամարտության հնարավորությունն ավելի փոքր է, քան 2008 թվականին։ Ռուսաստանը յուրաքանչյուր պահի կարող է բանակցություններ սկսել, քանի որ Վրաստանը պատրաստ է դրան։ Վրաստանի շրջաններում ռուսական զորքերի առկայությունը չի խանգարի ՆԱՏՕ-ին Վրաստանի անդամակցությանը»:
Հիշեցնենք, որ ՆԱՏՕ-ի կանոնադրության 5-րդ հոդվածի համաձայն՝ ՆԱՏՕ-ի անդամ մեկ կամ մի քանի երկրների վրա իրականացված զինված հարձակումը դիտարկվում է որպես հարձակում ողջ ՆԱՏՕ-ի դեմ։
