«Հայաստանը թունավորված է նախագահական համակարգով, և մեր երկրի միակ փրկությունը նախագահական համակարգից ազատվելու մեջ է»,- այսօր կայացած մամուլի ասուլիսի ժամանակ հայտարարեց ՀՅԴ պատգամավոր Վահան Հովհաննիսյանը:
Նրա խոսքով՝ Հայաստանում նախագահական համակարգը թունավոր է: «Ամեն հարց մեր երկրում լուծվում է նախագահի կողմից: Մնացած բոլոր որոշումները ճնշվում են»,- բացատրեց խորհրդարանականը:
Խոսելով Հայ առաքելական եկեղեցուն հարկային արտոնություններ տրամադրելու կառավարության նախաձեռնության մասին` ՀՅԴ պատգամավորը նկատեց, որ սա շատ նուրբ հարց է, և պետությունը պարտավոր է հատուցել ամենատարբեր` մասնավորապես խորհրդային տարիներին եկեղեցու կրած դժվարությունները: «Կրոնական այլ կազմակերպություններ, միաժամանակ, սա օգտագործելով որպես նախադեպ` կարող են աղմուկ բարձրացնել»,- կանխատեսեց խորհրդարանականը:
Անդրադառնալով Երևանի քաղաքապետ Կարեն Կարպետյանի հրաժարականին` Հովհաննիսյանը նկատեց, որ «շան գլուխը թաղված է» անձնական դրդապատճառների մեջ, որոնք հարցազրույցի ժամանակ հիշատակել էր նախկին պաշտոնյան: «Կարծում եմ ադմինիստրատիվ բնույթի են եղել հակասությունները: Եթե մարդուն վստահում ես մի ոլորտ, չպիտի տնօրինես նրա գործողությունները: Ի վերջո, դա Կարեն Կարապետյանի գործն էր, միաժամանակ՝ չեմ կարծում, որ նա բարձր ռոճիկի կարիք ուներ»,- նշեց խորհրդարանականը:
