Միխայիլ Խոդորկովսկու բանտախցի նախկին ընկեր Ալեքսանդր Կուչման, որը վստահեցնում էր, թե իրենից պահանջել էին սպանել ՅՈՒԿՈՍ-ի նախկին տնօրենին, քաղաքական ապաստան է խնդրել Մեծ Բրիտանիայից: Այս մասին РИА Новости-ին հայտնել է Անդրբայկալի իրավապաշտպան կենտրոնի տնօրեն Վիտալի Չերկասովը` Կուչմայի շահերի պաշտպանը:
Նրա խոսքերով` Կուչմային, որը հիմա ապրում է Չիտայում, մշտապես հետևում են և ճնշումների ենթարկում:
Կուչման իր պատիժն է կրել Չիտինսկի շրջանի գաղութում, որտեղ 2005 թվականի հոկտեմբերից մինչև 2006 թվականը գտնվել է Միխայիլ Խոդորկովսկին: 2006 թվականի ապրիլին Կուչման դանակով հարձակվել է Խոդորկովսկու վրա և դեմքը վնասել: Խոդորկովսկին քրեական գործ հարուցելու համար դիմում չի գրել:
2009 թվականին Կուչման Մոսկվայի դատարան էր դիմել` պահանջելով Խոդորկովսկուց 500 հազար ռուբլի՝ որպես փոխհատուցում սեռական ոտնձգությունների համար: Սակայն դատարանը մերժել էր բավարարել հայցը` չբացատրելով իր վճռի պատճառները:
