Իսպանական կոնսորցիումը հաղթել է Սաուդյան Արաբիայում արագընթաց երկաթուղու շինարարության մրցույթը, որի արժեքը կազմում է 7 միլիարդ եվրո: Այդ մասին հայտնում է France-Presse գործակալությունը` հղում կատարելով Թագավորության երկաթուղային վարչությանը: Ճանապարհը կապելու է Մեքքա և Մեդինա սուրբ քաղաքները, ինպես նաև Կարմիր ծովում Ջիդդայի նավահանգիստը: Ճանապարհի երկարությունը 450 կմ է:
Ճանապարհի շինարարության իրավունք ստացած կոնսորցիումի մեջ մտնում են իսպանական Renfe, Talgo, Adif, OHL և ութ այլ ընկերություններ: Մրցույթում նա հաղթել է երկաթուղային SNCF օպերատորից և Alstom ընկերությունից կազմված ֆրանսիական խմբին: Իսպանիան աշխարհում համարվում է բարձրակարգ երկաթուղիների շինարարության առաջնորդներից:
Ճանապարհը կառուցվելու է մուսուլման ուխտագնացների հարմարավետությունն ապահովելու համար: Տարեկան 2,5 միլիոն ուխտագնացներ հաջ (ուխտագնացություն) են կատարում Մեքքա: Նշենք, որ ոչ մուսուլմաններն իրավունք չունեն գտնվել իսլամի սուրբ քաղաքներում` Մեքքայում և Մեդինայում:
