Ադրբեջանական APA լրատվական գործակալության փոխանցմամբ՝ Ադրբեջան այցելած Վրաստանի արտգործնախարար Գրիգոլ Վաշաձեն, Բաքվում պատասխանելով լրագրողների հարցերին, անդրադարձել է Ղարաբաղյան հակամարտության կարգավորմանը.
«Բանակցությունների յուրաքանչյուր ձևաչափ պետք է պահպանել, յուրաքանչյուր բանակցություն ավելի լավ է, քան բաց կամ սառեցված հակամարտությունը։ Օրինակ՝ 2009 թվականից ընթանում են ժնևյան բանակցությունները, որոնք ցայժմ ոչ մի արդյունք չեն տվել։ Ռուսաստանը հրաժարվում է իրեն ճանաչել հակամարտող կողմ։
Չնայած այդ ամենին՝ Վրաստանն անում է ամեն ինչ՝ բանակցությունների ժնևյան ձևաչափը պահպանելու համար։ Ես կարծում եմ, որ նույնը պետք է վերաբերի մյուս բոլոր բանակցություններին, այդ թվում՝ նաև ԵԱՀԿ Մինսկի խմբի միջնորդությամբ Հայաստանի ու Ադրբեջանի միջև տարվող բանակցություններին։
Անհրաժեշտության դեպքում Վրաստանը պատրաստ է իր օգնությունը ցուցաբերել կամ առաջարկել իր միջնորդությունը Ղարաբաղյան հակամարտության կարգավորման գործընթացում։ Հարավային Կովկասը միասնական օրգանիզմ է, այն անհնար է մասնատել։
Հարավային Կովկասի երեք երկրները պետք է հասկանան, որ գտնվում են մեկ նավակում, և մեր ինքնիշխանությունն անքակտելիորեն կապված է։ Եթե երբևէ զգացվի այս հակամարտության կարգավորման գործընթացում մեր աջակցության կամ միջնորդության կարիքը, ապա մենք պատրաստ ենք դրան»։
